Danmarkimi coronamik tunillatsissimasut aatsaat taama amerlatigisut nalunaarsorneqartut

Danmarkimi inuit 859-it coronavirusimik tunillatsissimasutut ullup ataatsip ingerlanerinnaani nalunaarsorneqartut, Statens Serum Institutimit (SSI) kisitsisit takutippaat.

Danmarkimi coronap ajornartoortitsilermalli ullormi ataatsimi tunillatsisut aatsaat taama amerlatigipput.

Napparsimmavimmi uninngasut ataatsimik amerlillutik 125-nngorput. Uninngasunit 125-nit 18-it peruluttut uninngavianniipput, taakkunanngalu 13-it anersaartornerannut ikiorsiissutaasumik anersaartuuteqartinneqarlutik.

Coronavirusimillu toqquteqartutut nalunaarsorneqartut pingasunik ilapput, coronavirusimik toqquteqartut katillugit 697-inngorlutik.

AAMMA ATUARUK Mette Frederiksen: Danmarkimi corona pillugu nutaanik killilersuisoqassaaq

Tunillatsittut amerlassusaannut atatillugu tunillaassuuttoqarnerata annikillinissaa pissutigalugu sukkasuumik sunniuteqarluartumillu iliuuseqartoqarnissaa pingaaruteqartoq, Aarhus Universitetshospitalimi nakorsaaneq, Lars Østergaard oqarpoq.

- Tunillatsittummi ullut tamaasa amerliartornerat tamanut ersarilluarpoq.

Taassuma tunillatsittut amerlingaatsiarnerat pissutigalugu misissortittoqarnissaa tunillatsissimasinnaasunillu ujartuinissaq pingaaruteqartoq oqaatigaa.

Tamatuma saniatigut piumasaqaatigineqartillugu ungasillisimaarnissamut, asssanut tunillannartuiaammik atuinissamut, anersaartuutinut illersuuteqarnissamut siunnersuutit ilisimaneqarluartut eqqaamanissaat inunnillu amerlavallaartunik naapitaqannginnissaq pingaaruteqartoq, Lars Østergaard erseqqissaavoq.

Ministeriuneq nunatta nalunaaqutaa malillugu ualimut pingasut qeqqanut tusagassiortunik katersortitsinissamut qaaqqusivoq, ministeriunerup nutaanik killilersuisoqalernissaa sisamanngormat ilimasaarutigereerpaa.

AAMMA ATUARUK Nunanut allanut ministereqarfik: Nunarsuarmi killeqarfiit tassuugu matuneqarataannaapput

Europami nunani allani killilersuinerit sukannernerusut atorneqalerput. Assersuutigalugu sumiiffinni qassiiusuni unnukkut aninissaq inerteqqutaalersinneqarput imaluunniit innuttaasut sapinngisamik angerlarsimaannaqquneqarput.

Lars Østergaardilli killilersuinerit taava annertutigisut pisariaqarsorinngilai.

- Danmarkimi pissutsit nunani allani takusatsitulli inngillat. Suliniuteqajaartoqarneratigulli illuanut saatsitsisoqarsinnaavoq, taanna oqarpoq.

/ritzau/