Mette Frederiksen: Danmarkimi corona pillugu nutaanik killilersuisoqassaaq
Danmarkimi tunillatsissimasut nutaat 760-it sisamanngornermi nalunaarsorneqaput. Taamaammat Danmark nunatut allatuulli ilungersunartigisumik inissisimalermat killilersuinerit nutaat atulersinneqarnissaat pisariaqarpoq.
Ministeriuneq, Mette Frederiksen (S) aalajangersumik oqarpoq.
- Corona uteqqippoq. Killilersuinernillu allanik atulersitseqqissaagut, Mette Frederiksen oqarpoq.
Taanna peqqinnissamut ministerip, Magnus Heunickep (S) naalakkersuisut ulluni tulliuttuni nutaanik killilersuinissaq isumaliuteqarnerannik sisamanngornermi siusinnerusukkut aarlerisaaruteqarnerata kingorna nalunaaruteqarpoq.
AAMMA ATUARUK Nunanut allanut ministereqarfik: Nunarsuarmi killeqarfiit tassuugu matuneqarataannaapput
Minsiteriunerup katerinnissamut inerteqquteqarnissaq naalakkersuisunit sulissutigineqartunut ilaasoq erseqqissaatigaa. Mette Frederiksenip suliniut nutaat annikitsualuttortaasa nalunaarutigineqarnissaat piariivinnissaanut utaqqissutigigallarniarpai. Taakku ulluni tulliuttuni piareernissaat naatsorsuutaavoq, sulili piffissalerneqanngillat.
Ileqquusumik julefrokostertoqassanngitsoq
Danskit decembarip qaammataani ileqquusumik julefrokosternaviannginnertik ilisimasuutigilereersinnaagaat Mette Frederiksenip aarlerisaarutigaa. Minsiteriuneq oqarnera naapertorlugu danskit inuiaqatigiit akornanni iliuusaat coronamut ”sakkussani pitsaanerpaagallarpoq.
Julefrokosternerit novembarip naanerani aallartikkajuttarput decembarimilu ingerlanneqartarlutik. Ukioq manna julefrokostertorpassuunavianngitsut ilimagissavarput?
- Aap. Tamanna naatsorsuutigileriissavarput. Imaanngilarli suleqatit ilaat ukiumut qaangiuttumut torersumik illersorneqarsinnaasumillu qujaffigineqarsinnaanngitsut, pissutsit piffissamut tassunga qanoq inissisimanerat apeqqutaassaaq.
- Kisianni julefrokosternerni nilliasoqarlunilu qittattoqartarpoq. Imigassartortoqangaatsiartarlunilu. Tamakkulu tunillaassuuttoqarnissaanut tunngaviusinnaapput.
Suliffeqarfinnik matuseqqikkusunngitsoq
Qaammatinilu kingullerni coronap ilungersunartorsiortitsinerani ajornakusoortumik qinersisariaqarneq aalajangiiffigeqqittariaqarpaa. Inuiaqatigiit akornanni ikinngutinik, ilaquttanik, suleqatinillu naapitsisarnigut killilersinnaavagut. Imaluunniit suliffeqarfiit, atuarfeqarfiit ilinniarfeqarfiillu matuneqaqqittariaqassapput.
- Suliffeqarfinnik matusinissamik kissaateqanngilagut. Meeqqat atuarsinnaaginnartikkusuppagut. Ilinniarfeqarfiillu ammaassannassapput, ministeriuneq oqarpoq.