Danmarkip socialministeria nunatsinnut tikeraartoq
Danskit isumaginninnermut ministeriat Astrid Krag, nunatsinnut tikippoq.
Maaniinnermini Meeqqanut, Inuusuttunut, Ilaqutariinnermut, Peqqinnissaqarnermullu naalakkersuisoq Mimi Karlsen (IA) naapissavaa.
Astrid Kragillu nunarput aatsaat tikilinngilaa.
Ukiummi marluk matuma siorna Nuummiippoq, tassani suleqatigisimasani naalakkersuisuusimasoq Martha Abelsen (S) naapippaa.
Danmarkip meeqqat inuusuttullu atugarliortunut 80 millioninik 2019-mi tapiinera tikeraarneranut pissutaavoq. Tamanna pivoq naak isumaginninnermut suliassaqarfik Namminersorlutik Oqartussanik akisussaaffigineqalereernikuugaluartoq.
Innersuussutit 16-it tunuliaqutaat
- 2019-imi upernaakkut DR-imi piviusulersaarutitut aallakaatitami, Tasiilaq sammineqarmat 'Byen hvor børn forsvinder' – ’Illoqarfik meeqqat tammartarfiat’ aallakaatinneqarpoq. Tassani annertuumik sumiginnagaaneq, kinguaassiuutitigut atornerluineq, meeqqanik inuusuttunillu nukiisernerit kiisalu oqartussat akulerutinngitsut takutinneqarput.
- Tamatuma kingunerisaanik Naalakkersuisut Inatsisartuni amerlanerussuteqartunit danskit naalakkersuisuinut nunatsinni meeqqantu inuusuttunullu sulissaqarfimmi suliutinut ikiorneqarnissamik qinnuteqaqquneqarput.
- Danmark sulissaqarfimmut tassunga 2023 ilanngullugu 100 mio. koruuninik aningaasaliinissamik immikkoortitsivoq.
- Kalaallit danskillu susassaqarfinni taakkunani suliaqartut ataatsimoorlutik siunnersuuteqarput. Taakkulu nunatsinni meeqqat inuusuttunullu pitsaanerusumik inuuneqarnissaanut atatillugu katillugit 16-inik innersuussuteqarput.
Astrid Kragip 2019-mi tikeraarnini suliniutinik 16-inik saqqummiussinermik naggaserpaa. Suliniutini arnanit naartusuniit angajoqqaanut pikkorissaaneq, meeqqanut paaqqinnittarfinni sulisut ilinniagaqarnissaat aamma kinguaassiutitigut kannguttaatsuliorsimasunut katsorsaaneq kiisalu meeqqat inuusuttullu unnukkut sapaatip akunneratalu naanerani orniguffiusinnaasut ilaasut ilaatigut saqqummiuppai.
Maannalu Astrid Kragip nammineq isiminik ”ineriartornertorneq suliniutit pilersereernerannit qanoq allannguuteqarsimanersoq takuniassavaa,” Naalakkersuisut nittartakkaminni taama nalunaaruteqarput.
Astid Krag Nuummiiginnarnani aamma sumiiffinnut allanut tikeraassasoq
Astrid Krag ulluni sisamani nunatsinniinnermini nunaqarfiit Atammik Napasorlu Mimi Karlsen peqatigalugu tikeraarnissaat pilersaarutigivaat. Maniitsumut aamma tikissapput.
Nunaqarfinnullu tikeraarnerminni nunaqarfinni aqutsisut naapissavaat.
AAMMA ATUARUK Astrid Krag isumaginninnermi suliniutit pillugit: Iliuutsivut naammassimanngillat
Danskit ajornartorsiutinut aaqqiissutigisartagaat nunatsinni ajornartorsiutinut aaqqiissutaaginnarsinnaanngitsoq isumaginninnermut naalakkersuisoq, Mimi Karlsen isumaqarpoq.
- Nunaqarfimmi inuuneq ataqatigiilluarnermik pinngortitamillu ataasioqatigiinnermik takutitsisuuvoq. Kisianni aamma qallunaat aaqqiissutaat Kalaallit Nunaannut assiliniarneqartarnerisa sooq tamatigut ajornanngitsuinnaasannginnerat pillugu paasinnilersitsisinnaavoq, Mimi Karlsen oqarpoq.
Danmarkimiit ikiorneqarneq
Isiginnaagassiaq piviusulersaarut ”Byen hvor børn forsvinder” saqqummiunneqarnerata kingunerisaanik nunatsinni meeqqanut inuusuttunullu suliniutinut pitsanngorsaataasussanik 16-inik innersuussuteqartoqarpoq.
Isiginnaagassiaq DR-ikkut 2019-imi upernaakkut isiginnaartinneqarpoq. Piviusulersaarutip pingaartumik Tasiilami inooqataanikkut ajornartorsiuteqartoqangaatsiartoq takutippaa.
Aallartissutissallu naammapput. Nunatsinni meeqqat pingasuugaangata ataaseq meeraanermini sumiginnagaanermik angajoqqaallu akisussaaffiisa naammannginnerannik nalaataqarsimasarpoq.
AAMMA ATUARUK Danskit ministeriat meeqqanut ikiuunneq pillugu: Inassutit tamarmik timitalerneqassapput
Meeqqat 1995-imi kingusinnerusukkulluunniit inunngorsimasut tallimaagaangata ataaseq kinguaassiutitigut atornerlunneqarsimasarpoq.
Innuttaasunik misissuineq siornameersoq naapertorlugu inuusuttut 1995-imi kingusinnerusukkulluunnniit inunngortut misissuinermi ilaasut 28 procentii angerlarsimaffimmi nakuusertoqarneranik nalaataqarsimasarput.
Astrid Krag nunatsinnut tikeraarnini naggaserlugu naalakkersuisunik ataatsimeeqateqassaaq. Tassani tikeraarnermi nalaani ilisimalersimasat kiisalu sulinerup ingerlateqqinnissaa oqallisigineqassapput.
