Dalai Lama napparsimmavimmit angerlartoq

Dalai Lama Indiami illoqarfiit pingaarnersaanni, New Delhimi napparsimmavimmi ullut pingasut uninngareerluni peqqissigami angerlarpoq. Tibetimiut anersaakkut siuttuata oqaaseqartartua taama ilisimatitsivoq

- Ullaaq arfineq pingasunut angerlartinneqarpoq, oqaaseqartartoq, Tenzin Taklha oqarpoq.

Taassuma 83-inik ukiulik, Dalai Lama ”peqqisseqqinnerarpaa”.

Dalai Lamap quersornini sakissamigullu anniarnini pissutigalugit marlunngornermi unitsinneqarpoq. Dalai aseruuttoornermut nakorsaaserneqareerluni sisamanngornermi pitsanngoriartulerpoq.

AAMMA ATUARUK Dalai Lama napparsimmavimmi uninngasoq

Dalai Lama Dharamsalamit timmisartuunneqarluni New Delhimut nakorsiaanneqarpoq.

Dharamsala Indiap avannaaniittoq Dalai Lamap Tibetimit 1959-imiilli qimaagami najugaqarfigilerpaa. Taamaniilli buddhistit siuttuattut atuutilerluni.

Kommunistit Beijingimi pissaanermik tiguaanerata kingorna kinamiut Tibet tiguarpaat. Kinamiut naalakkersuisuisa oqarnerat naapertorlugu Tibet ”Kinamut ilaavoq”, tamannalu pissutigalugu Kinamut ataqatigiissinneqaleqqissalluni.

Tibetimi 1959-imi innuttaasut anersaakkut siuttortik, Dalai Lama illornerniarlugu naalagaaffimmik tiguaasumut akerlileerujussuarput.

Akerliliineq Kinamiut sakkutuuinit uppisinneqarpoq.

Dalai Lama – 14-issaat maannalu atuuttoq – Himalayakkoorluni Indiamut qimaavoq.

Ukiuni kingullerni 60-ini Kinap Tibet ”nutarsarpaa” nunalu kinamiunut nunasisunut millionilikkaanut nunasianngortillugu. Tibetimiut nunap immikkoortuani ullumikkut ikinnerussuteqarput.