D: Politikerit kommunerujussuarni sinniisuusariaqarput
Naalakkersuisut inatsisissatut siunnersuutiminni, kommunitoqqat kommunalbestyrelsini pinngitsooratik sinniisoqarnissaat siunnersuutigimmassuk, Demokraatit politikkikkut oqaaseqartartuat Andreas Uldum tusagassiuutinut nalunaarummini taama allappoq.
- Nunami maani innuttaasut sumiikkaluarunilluunniit partiimik inunnillu sassartunik taasisinnaasariaqaraluarput, kisitsinerlu naammassippat kommunalbestyrelsimut ilaasortanngortut tassaassapput partiini ataasiakkaani amerlanerpaanik qinerneqarsimasut.
Inuinnaat naalakkersueqataaneranni tamanna eqqornerpaatut isigaarput.
Naalakkersuisut siunnersuumminni najugaqarfigisami oqartussaaqataaneq nukittorsarniarlugu siornatigut kommuniusimasut minnerusut maanna kommuniusunut ilaasut ilaasortaatitaqarnissaat anguniaraluarpaat.
Tamannali Andreas Uldumip isumaqatiginnngilaa.
- Ataatsimik qinersiveqarnerup politikerit qinikkat eqqaasittarpai illoqarfinnut nunaqarfinnulluunniit ataasiakkaanut sinniisuunngimmata, sinniisuusulli kommunip tamarmiusup soqutigisai sulissutigissallugit, Demokraatit oqaaseqartartuat tusagassiuutinut nalunaarummini allappoq.