Covid-19-imut akiuussutissaq sineriammut januaarimi ingerlaartinneqalissasoq

Sineriammi Covid-19-imut akiuussutissamik februaarinngortinnagu kapisisoqalernissaa pilersaarutaavoq. Matumani Aasianni, Sisimiuni Qaqortumilu innuttaasut siulliunneqassapput.

Nakorsaaneq, Henrik L. Hansen tusagassiortunik sisamanngornermi ualikkut katersortitsinermi oqarpoq.

- Piffissami qaninnerusumi akiuussutissanik pissarseqqinnissarput naatsorsuutigaarput. Akiuussutissaq taanna suli assartorumingaatsuuvoq, allamilli qinigassaqanngikkallarnermi akiuussutissat taakku tamarmik atorluarneqarnissaat aamma januaarimi akiuussutissiilereersinnaanissarput qulakkeerusupparput.

- Aasianni, Sisimiuni, Qaqortumilu qaammat una akiuussutissamik kapisilereernissarput naatsorsuutigaarput.

Nuummi Ilulissanilu innuttaasut siulliit Covid-19-imut akiuussutissamik kapineqarput.

Illoqarfiit taakku marluk akiuussutissap atorneqartup isumaginiarnissaata ajornakusoornera pissutigalugu toqqarneqarput. Akiuussutissap minus 70-inik 80-inut nillissuteqartumi uninngatinneqarnissaa ilaatigut pissutaavoq.

Akiuussutissaq nutaaq nunatsinnut tamarmut assartorneqarsinnaasoq

Innuttaasut siulliit 1000-it sapaatip-akunnerani matumani kapitinnissaat pilersaarutaavoq. Tamannalu piviusorsiorpaluttoq nakorsaanerup nalilerpaa.

- Naatsumik paasissutissiissutigisinnaavara akiuussutissamik kapisinerit – aallaaqqasiutigalugu Nuummi Ilulissanilu ingerlanneqartut – pissusissamisut ingerlammata. Maannamut kapisisimanigut ilorrisimaarutigingaatsiarpagut, Henrik L. Hansen oqarpoq.

Akiussutissalli sunniuteqarnissaanut sapaatit akunnerisa pingasut missaasa ingerlanerini marloriarluni kapitittoqarnissaa piumasaqaataavoq, taamaammat suli naammassivinngillat.

Coronavirusimut akiuussutissaq nutaaq EU-Kommissionimit pingasunngornermi akuerineqarpoq. Taanna amerikamiut suliffeqarfiannit, Modernamit suliarineqarpoq, taannalu nunatsinni atorneqartunit ajornaannerungaatsiarluni.

AAMMA ATUARUK Naalakkersuisut corona allaanerusoq pissutigalugu nunatsinnukarnissamut inerteqquteqarneq sivitsorpaat

Nakorsaanerup oqarnera naapertorlugu tamanna nunatsinni akiuussutissamik kapisinissamut periusissiamut pitsaasupilussuuvoq.

- Nunatsinni qaqugu pigilersinnaassanerlutigu naluarput, kisianni qaammatip tullianiunissaa neriuutigaarput. Taamaalilluta nunatsinni sumiiffiit tamarmik angusinnaassallutigit, nakorsaaneq oqarpoq.

Akiuussutissaq nutaaq akiuussutissatut maannakkut atorneqartutulli taama nillertigisumiitsinnissaa pisariaqanngilaq.

 Akiuussutissalli nutaap nunatsinnut tikiunnissaanut piffissaq sivisusinnaavoq. Modernammi akiuussutissat taama amerlatigisut nunarpassuarnut utaqqisunut tunniussinnaanngikkallarpai.