Assi: KNR / Nina Vivi Møller Andersen

Naalakkersuisut corona allaanerusoq pissutigalugu nunatsinnukarnissamut inerteqquteqarneq sivitsorpaat

Danmarkimit angerlarneq ajuleqqasut tamarmik angerlareerpata nunatsinnut angalasinnaaneq Naalakkersuisunit matuneqaqqissaaq.

Covid-19 allaanerusoq Tuluit Nunaanni paasineqartoq Danmarkimi tunillaassuutilerpoq.

Tunillaassuuttoq nutaaq nunatsinnut anngutinngilaq. Naalakkersuisulli Danmarkimi tunillaassuuttoqarnera tunngavigalugu corona pillugu periusissiartik allanngortippaat.

Aningaasaqarnermut naalakkersuisoq, Vittus Qujaukitsoq (NQ) nassuiaavoq.

- Nunaqqatigut piaarnerpaamik angerlartissavagut. Tamanna maanna sulissutigaarput. Taakku angerlareerpata nunatsinnukarnerit matussavagut, naalakkersuisoq tusagassiortunik katersortitsinermi oqarpoq.

Vittus Qujaukitsup nunatsinnut angalasut tunillatsissinnaanissaat aamma aarlerinartoqartoq oqaatigaa.

- Taamaammat misissorteqqittoqartarnissaanut atatillugu peqqinnissaqarfiit malinnaasinnaanissaat pissutigalugu aaqqissuussisoqartariaqarpoq, taamaalilluta tunillaassuuttoqaleratarsinnaanissaanik isumaginninnissamut sillimanerusinnaassalluta, taanna oqarpoq.

Danmarkimi piffissaq ajornakusoortoq

Danmarkimi tunillatsissimasut amerlasut amerlasuullu napparsimmavimmut unitsinneqarsimasut nakorsaanerup, Henrik L. Hansenip oqaatigaa.

- Danmarkimi napparsimmaviit inissaqassusaat tamarmik atorneqarput. Pissutsit taakku nunatsinnut unammillernassaaq pissutigalugu Danmarkimit ikiorneqarnissaq ajornakusuussammat, nakorsaaneq oqarpoq.

Covid-19 allaanerusoq virusimit atuutereersumik ulorianarnerunngitsoq nakorsaanerup nassuiaatigaa. Taannali tunillaannera sukkaneruvoq.

- Taamaammat amerlanerusut piffissap sivikitsup ingerlanerani napparsimalerput. Virusip allaanerusup tunillaassuunnera 50-init 70-inut annertuneruvoq. Corona allaanerusoq nunatsinniilernissaa kissaatiginngilarput.

Angerlarneq ajuleqqasut angerlassasut

Naalakkersuisut ukiup nutaap aallarinnginnerani nunatsinnut angallanneq januaarip ulluisa aqqaneq-aappaanut matuaat. Maannali nutaamik periusissiaqalerpoq.

Nunatsinnut angerlarneq ajuleqqasut piaarnerpaamik angerlassapput.

- Innuttaasut sapaatip-akunnerata siuliani angalanissaannik januaarip ulluisa aqqaneq-aappaata kingornamut kinguartitsiffiusut maanna angalanissamut billetsimik tunineqassapput. Amerlasuut inniminnikkaminnit siusinnerusukkut angalasussanngortinneqarsinnapput, peqqinnissamut naalakkersuisoq, Anna Wangenheim (D) oqarpoq.

Angalanissamut ullup neqeroorutaasup allanngortinnissaa periarfissaassanngitsoq, taanna oqarpoq.

- Tikittussat tamarmik tikereerpata februaarip qaammataanit matussaagut, Anna Wangenheim oqarpoq.

Nunatsinnukarnissamut inerteqquteqarneq Danmarkimit angerlarneq ajuleqqasut tikereerpata maanna februaari qaammat tamaat atuuttussaagallarpoq.

Corona pillugu allattoqarfiup Air Greenland suleqatigalugu angalanissamut pilersaarutit nutaat nassiussulerpaat.

- Danmarkimiikkuit nunatsinnullu angerlarnissamut billetsimik inniminniisimaguit taama nutaamik angalanissamut pilersaarummik tunineqassaatit. Amerlanerpaalli ulloq inniminnigartik tigummiinnassagaat, peqqissutsimut naalakkersuisup, Anna Wangenheimip (D) oqaatigaa.

Pileriusissiaq nutaaq tunngabigalugu angalanissamut ullussaritinneqartoq siusinnerusunngortinneqarsinnaavoq. Taamaammat angalasussat tamarmik angalanissamut pilersaarummik misissuilluarnissat kaammattuutigineqarpoq. Innuttaasut sapaatip-akunnerata siuliani angalanissaannik januaarip ulluisa aqqaneq-aappaata kingornamut kinguartitsiffiusut maanna angalanissamut billetsimik tunineqassapput.

Inniminniinerit ataatsikkoortut attavigineqassapput, taamaalillutik ataatsimut allanngortitsiffiussallutik. Air Greenlandip angalasussat mailikkut oqarasuaammulluunniit inniminniinermi atorneqartumut attavigissavai. Angalatitsiviit aqqutigalugit inniminniisimasut nammineerlutik taakkununnga attaveqassapput.

Angalartussat tallimanngorpamiit tikiorartinneqalissasut

Corona pillugu aqutsisoqarfiup pisortaata, Hans Peder Barlachip oqarnera naapertorlugu Danmarkimit angerlarneq ajuleqqasut tallimanngorpat ullaakkumit arriitsumik tikiorartinneqalissapput.

- Ilaasut marlunngorpamiit amerlanerulissapput, taanna oqarpoq.

Nunatsinnimi misissuisinnaaneq aeqqutaalluinnarpoq. Danmarkimiilli nunatsinnut ilaasut  marlunngorpamiit 180-iusinnaalissapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat