- Aarlerinartunik naliliinitsinni nunarsuarmut tamarmut siaruaattumik tuniluuttoqaratarsinnaanera ilaanngilaq. Kinguariarfiuvoq suliaqarniarnitsinnullu tamanna nikallornarluni, sulisugulli nunaqavissuusut maaniiginnartullu suliaqaat. Suliaqarneq ingerlaannarpoq, taamaammat unittuuittoqanngilaq, Hans Christian Munck oqarpoq.Assi: Jakob Nukannguaq Geisler

Coronavirusip mittarfinnik sanaartorneq unikaallatsikkaa

Coronap ajornartorsiortitsinera Munch Gruppenimut Nuummi Ilulissanilu mittarfissanik sanaartuleruttortumut ”unikaallatsitsivoq”. Sulisummi maanna 30-t nunatsinnukarsinnaanngillat.

Sanaartornermik suliaqartartoq, Munch Gruppen upernaami ulloq unnuarlu qaamanerani Nuummi mittarfiliornermik suliaqarnissamut sulisullu amerlinissaannut piareersimagaluarpoq.

Coronali ajornartorsiortitsilerpoq.

Coronap ajornartorsiortitsinera maanna sulisunik 30-t tikillugit amerlassusilinnut, qaartiterinermik qaartitsiffimmiillu assartuingaatsiarnermik suliaqartussanut nunatsinnut angallassisinnaanngititsivoq. Munck Gruppenimi pisortaaneq, Hans Christian Munck taama nassuiaavoq.

AAMMA ATUARUK Nuummi Mittarfisssaq: Qaartiterinerit amerlanerusinnaasut akulikinnerullutillu

- Unammillernartoqartitsivoq. Sanaartornissat naatsorsuutigisagut angumerisinnaanngilagut, taanna oqarpoq, itisiliillunilu:

- Ammaasoqarnissaanut suliaqaqqissinnaalernissatsinnullu utaqqivugut. Inuilli 30-t imaaliallaannaq aallartussaallutik mittarfimmiinngillat. Piaartumik tikissinnaatilerniarlugit suliaqarpugut.

Unikaallatsitsilaartoq

Hans Christian Munckip oqarnera naapertorlugu coronap Nuummi Ilulissanilu mittarfiliorniarnernut atatillugu qanoq kinguneqassanera oqaaseqarfigissallugu siusippallaarpoq.

- Tamanna takusinnaanngilarput. Qanoq sivisutigissanera apeqqutaavoq, Hans Christian Munck oqarpoq.

Pisortap Munck Gruppenip suliassarisarsimasaani annerpaasumi suliaqarnissamut coronavirus unikaallatsitsilaarnerarpaa.

AAMMA ATUARUK Video: Booom – mittarfimmillu sanaartorneq aallartinneqarpoq

Suliffeqarfiup aqquserngit ukiuunerani piareersarlugillu pilersippai taamaalilluni aqqutigineqarsinnaalerluni, kiisalu qaartiterineq qaartitsiffimmiillu assartuinerit aallartinneqarlutik.

Kingullerlu eqqaaneqartoq pilersaarut malillugu saniatigut sulisulersorneratigut annertusineqartussaagaluarpoq.

- Aarlerinartunik naliliinitsinni nunarsuarmut tamarmut siaruaattumik tuniluuttoqaratarsinnaanera ilaanngilaq. Kinguariarfiuvoq suliaqarniarnitsinnullu tamanna nikallornarluni, sulisugulli nunaqavissuusut maaniiginnartullu suliaraat.

- Suliaqarneq ingerlaannarpoq, taamaammat unittuuittoqanngilaq, Hans Christian Munck oqarpoq.

Amerlanerit nunatsinniiginnartut

Munck Gruppenip pilersaarummi nunaqavissunik sulisoqarnermi saniatigut nunanit eqqatsinniittunit – pingaartumik Danmarkimiit aamma sulisoqarpoq.

- Poorskertinnagu matusisoqarnissaa nalunaarutigineqarmat maaniiginnassanerlutik angerlapallassanerlutilluunniit aalajangertussaanikuuaat. Sulisut amerlanerpaartaat maaniiginnarniarlutik aalajangerpaat, tamannalu suliffeqarfiup tungaaniit qujamasuutigeqaarput. Taamaalilluni suliaqarnerput naammaginartumik ingerlatiinnarsinnarsinnaallutigu, pisortaaneq oqarpoq, nangillunilu:

- Ilaat ilaqutattaminnik pissuteqarlutik aallartariaqarsimapput, taamaammat sulisukinneruvugut, suliaqarnerli ingerlaannarpoq.

AAMMA ATUARUK Første sprængning til ny lufthavn i lIulissat i dag

Coronap ajornartorsiortitsinera Ilulissani mittarfimmik sanaartornermut aamma unammillernartoqartitsivoq. Munck Gruppen Ilulissanut mekanikerinik sulisunillu allanik aallartitsivissamik pilersitsiniartortussanik aallartitsisinnaanngillat, tamannalu suliap ingerlaneranut kinguartoortitsivoq.

Nuummi Ilulissani mittarfissat nutaat sanaartorneqarnerisa 2023-p naanerani naammassinissaat pilersaarutaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat