Ilulissani mittarfissamut ullumi siullermeertumik qaartitsisoqalersoq
Kalaallit Airportsimut pingaarutillip aappaa Ilulissani ullumi malunnartinneqassaaq.
Ilulissat mittarfiata avataani nalliuttorsiorpaluttumik nalunaaqutaq 13.15 qaartitsisoqassaaq. Malunnartitsinissarlu Kalaallit Airportsimit nuannaarutigineqarpoq.
Aap, ullumimut pissangaqaagut, pilersaarutillu aallartilernera tulluusimaarutigeqaarput. Qaartitsinissamut siullermut qilanaaqaagut, innuttaasut soqutiginnittut takkussuunnissaat neriuutigaarput, Kalaallit Airportsimi suliniutinut pisortap tullersortaa, Aviaaja Karlshøj Knudsen oqarpoq.
- Nuummi nunanut allanut mittarfissap sanaartorneqarnera oktobarip 15-ianni aallartinneqarpoq.
- Kalaallit Airportsip Nuummi Ilulissanilu mittarfiit 2023-p naajartornerani pisaarnissaat naatsorsuutigai.
- Qaqortumi mittarfissaq 2023-mut aamma pilersaarutaavoq, aappaagulu sanaartornissamut suliariumannittussarsiuussisoqarnissaa naatsorsuutigineqarpoq.
Naalakkersuisut siulittaasuat, Kim Kielsen (S) attaveqatigiinnermullu naalakkersuisoq, Karl Frederik Danielsen (S) qaartitsinermi najuullutillu oqalugiassapput.
AAMMA ATUARUK Nuummi Mittarfisssaq: Qaartiterinerit amerlanerusinnaasut akulikinnerullutillu
Qaartitsineq siulleq mittarfissamut suliffissaq aqqutissarissavaa. Aqqusinerli taanna ukioq manna apriilip qaammataani aatsaat aqqutigineqassaaq.
Ullumi qaartitsisoqareerpat sanaartugassanik suliassinneqartartup Munck Gruppenip suliami ilaannik atortunillu Nuummit Ilulissanut assartuilernissaanut tassa apriilip tungaanut allamik susoqarnavianngilaq.
- Munck Gruppenip suliffissartik atortussallu tamarmik pisariaqartitatik, containerit najugaqarfissat, sannaviit ilaalu aallaqqaammut pilersissavai. Tamatuma kingorna sulinermi atortussatik umiarsuakkut assartussavaat. Taakkulu kingornatigut mittarfissamik sanaartuinneq aallartinneqassalluni, Aviaaja Karlshøj Knudsen oqarpoq.
Munck Gruppenip Nuummi Ilulissanilu mittarfinnik sanaartortuunissaa siorna aggustimi isumaqatigiissutigineqarpoq.
Ilulissani mittarfissap 2.200 meterinik takissuseqarnissaa pilersaarutaavoq.
