Nuummi Mittarfisssaq: Qaartiterinerit amerlanerusinnaasut akulikinnerullutillu
Nuummi mittarfissualiorneq aqagu aallartippat pilersaarutaasumit amerlanernik qaartiterisoqarsinnaavoq.
Sapaatip akunneranut marloriarluni, tassa pingasunngornikkut sapaatikkullu ullaakkut arfineq marluniit qulingiluap tungaanut qaartitsisoqartassasoq, Kalaallit Airportsip pilersaarutigigaluarpaa.
Pingasunngorpat qaartiterinissaq
Kalaallit Airport Nuummi nunanut allanut mittarfissap sanaartornissaanut qaartiterineq siulleq aallartilerpaa.
Nuummi Ilulissanilu mittarfiit sanaartorneqarnerat ukioq 2023-ip naalernerani naammassineqassasut naatsorsuutigineqarpoq.
Qaqortumi mittarfissaq 2023-mi naammassineqarsimasussatut pilersaarutigineqarpoq, aappaagulu suliariumannittussarsiuunneqarnissaa naatsorsuutigineqarpoq.
Nuummi mittarfissap sanaartorneqarata aallartinneqarnera, Nuummi sisoranermi majuartaatip Skilftenip eqqaani pingasunngorpat oktoberip ulluisa 16-anni ualikkut tallimanut qiteqquppat malunnartinneqassaaq siullermeerluni qaartisinikkut.
Pilersaarusiornerit piginneqatigiiffik Munck Gruppenilu isumaqtigiissummik suli atsioqatiginngitsut aallartipput. Nuummi Ilulissanilu mittarfiliornissanut aqqusinniornissanullu Munck Gruppen toqqarneqarpoq.
Nuummi Ilulissanilu ataatsikkut mittarfiliornerit ingerlanneqassasut aamma pilersaarutaagaluarpoq.
AAMMA ATUARUK Kalaallit Airports Nuummi mittarfissami siullermeertumik qaartitsilerpoq
Munck Gruppenimulli isumaqatigiissusiornerup kingorna pilersaarutit allanngorput. Tassami Nuummi mittarfiliorneq siulliunneqassasoq ingerlatsiviup aalajangiuppaa.
- Taava isumaqatigiissut allanngortipparput, tassa ukiut marluk Nuummi sanaartortoqareerpat ukiut marluk kingulliit Ilulissani sanaartornerit aallartissapput, Kalaallit Airportimi pisortaaneq Peter Wistoft oqarpoq.
Ilanngullugu oqaatigaa Kalaallit Airports ullaakkut arfineq marluniit unnukkut qulit tungaanut qaartiterinissamut periarfissaqartoq, tamannali Mittarfeqarfiit Air Greenlandilu peqatigalugit eqqartorneqaqqaassaaq.
- Tamanna massakkut oqaluuseraarput. Pilersaarutillu naammasseriarpata kalerriutigineqarumaarput.
Akuersissut utaqqiinnarpaat
Maannakkullu Kalaallit Airportsip Pinngortitamut, Avantangiisinullu Naalakkersuisoqarfiup akuersissuteqarnissaa utaqqiinnarpaa. Sulilu akuersissuteqartoqanngimmat pilersaarutit qanoq isikkoqarnersut, Peter Wistoftip oqaatigisinnaanngilai.
AAMMA ATUARUK Munck Gruppen skal anlægge landingsbanerne i Nuuk og Ilulissat
Pilersaarutilli akuerineqassasut taassuma naatsorsuutigaa.
- Susassaqartut oqaloqatigilluassavagut, sanaartornerit timmisartuussinernut akornutaannginnissaat anguniarneqassaaq. Tassami qaartiterinissamut akuersisoqareernikuuvoq.
Aamma Ilulissani qaartiterinerit amerlanerit
Ilulissanilu sanaartornissami piffissami sivikinnerusumi kisianni aamma akulikineerusumik qaartiterisoqassasoq naatsorsuutigineqarsinnaasoq, Peter Wistoftip oqaatigaa.
- Taamaliortoqarsinnaavoq, kisianni Ilulissani mittarfissaq illoqarfimmut ungasissumiippoq. Taamaattumik kikkunnulluunniit akornutaanavianngilaq. Ilulissanilu qaqugukkut qaartiterinissamut oqartussanit malittarisassaqanngilaq.
