Coronavirusimut akiuussutissaq piariingajalertoq kikkunnulluunniit akeqassanngitsoq
Coronavirusimut akiuussutissaq piareerpat kapitinnissamut aningaasanik atuisoqartariaqanngilaq. Akiuussutissaq naalagaaffeqatigiinni akeqanngitsumik tunniunneqassaaq.
Socialdemokratit peqqissutsimut oqaaseqartartuat Ramus Horn Langhoff taama oqarpoq.
- Danskit tarmarmik akiuussutissamik akeqanngitsumik neqeroorfigineqassapput. Akiuussutissamik perusuttut tamarmik pissarsinissaat qulakkeerniarlugu immikkut pisiortorumaarpugut.
- Aningaasat akiuussutissamik illersorneqarnissamut aalajangiisuussanngillat, Langhoff oqarpoq. Neqeroorut Kalaallit Nunaannut Savalimmiunullu aamma atuutissasoq ilanngullugu erseqqissaatigaa.
AAMMA ATUARUK Naalagaaffeqatigiit tamarmik coronamut akiuussutissaalerumaartumik qulakkeerissaasut
Danmarkimi nammineq akiligassanik akiuussutissaqaaluppoq. Soorlu nualluummut akiuussutissaq inunnut napparsimalernissamut qaninnerusunut akeqanngitsumik tunniunneqartartoq allanut akeqartarpoq.
Nunat EU-mi ilaasortat 27-upput, taakkunanngalu 21-it coronavirusimut akiuussutissiinermut periusissialioreertut siusinnerusukkut nalunaarutigineqarpoq. Periusissiaq taanna kikkut akiuussutissamik kapineqaqqaarnissaannut pilersaarutaavoq.
AAMMA ATUARUK EU coronavirusimut akiuussutissanik 200 millioninik pisinissamik isumaqatigiissuteqartoq
Periusissiassaq suli piffissaatillugu piariissaqqaartoq, socialdemokratit peqqissutsimut oqaaseqartartuat Rasmus Horn Langhoff oqarpoq.
- Piariingajalerpoq. Eqqarsaatigisassat amerlapput.
- Kikkut akiuussutissamik qaqugu kapineqarnissaat politikkikkut assortuussutaaleqqunagu periusissiap peqqissutsimik immikkut ilisimasallit naliliinerannik innersuussutaannillu tunngaveqarnissaa pingaarnerpaavoq, taanna oqarpoq.
- Coronavirusimut akiuussutissat Danmarkimut tikippata atuuffissaanni piffissaatillugulu tunniunneqarnissaat isumannaatsumiitinnissaallu qulakkiissavarput, taanna oqarpoq.
Coronavirusimut akiuussutissaq piariingajalerataannaavoq.