Upernavik ulluni makkunani inorasaanngeqaaq. Illoqarfimmimi coronavirusi tuniluuttorujussuuvoq.Assi: Søster Hermarij

Coronap Upernavik matugaa: Soorlulimi Upernavimmi kisimiillunga

Upernavimmi coronavirusip tuniluutiloorneranit inuit aqqusinermi naapitassat akuttupput.

Søster Hermarij aqqusinikkoortilluni illoqarfini allaanerulluinnartoq maluginiarpaa. Meeqqanik apummi pinnguartoqanngilaq, inunnik naapitassaqanngilaq biilillu ataasiakkaat kisimik sanioqqutillattaapput.

- Nikalluallappunga soorluli Upernavimmi kisimiillunga. Uffali angerlarsimaffinnut iseruma illoqateqarlunga, kisianni aqqusinermi meeqqat maqaasiummertorujussuuakka, Søster Hermarij oqarpoq.

Søster Hemarijip meeqqat atuarfianni maanna matoqqasumi meeqqat sullitarai.

Upernavimmi nunaqarfiinilu coronavirusi tuniluuttorujussuuvoq. Nappaammik tunillatsissimasut Upernavimmi 81-it ippassaq paasineqarput.

Upernavimmi tuniluunneq ima annertutigaaq innuttaasut 1.100-t missaanniittut tamarmik tunillatsissimasumut qanillisimasutut isigineqalersut naalakkersuisut nalunaarutigaat.

AAMMA ATUARUK Upernavimmi killilersuutit arlallit atuuttut

Taamaammat illoqarfimmi killilersuineq sukateriffigineqaqqippoq. Sukaterinerup saniatigut akiuussusersuineq misissuutinillu tigooraanerit unitsinneqarlutik.

- Piffissaq sivikitsoq Upernavimmi nukiit allatut iliulaarluta pissutsinut naleqqussarluta atussavarput. Tunillatsissimasut amerlasuut ilisimavagut, taamaattumillu tunillatsissimasinnaasut amerlasuut misissornissaannut taarsiullugu, nukivut napparsimaruluttoqalernissaanut pinaveersaartitsinissamut atussavavut, peqqinnissamut naalakkersuisoq Kirsten L. Fencker (N) tusagassiutinut taama nalunaaruteqarpoq.

Eqqissisaallunilu:

- Upernavimmi inuit amerlasuut annilaanganerat paasisinnaalluarpara. Eqqaamassavarpulli Upernavimmi tamakkiisumik akiuussuserneqarsimasut amerlammata, taamaattumillu illoqarfik pisumut piareersimalluarpoq, Peqqinnissaqarfillu innuttaasut ajornartoorfimmiit aniguilluarnissaat anguniarlugu sapinngisartik tamaat ikiuutissaaq.

Nuliariit mattusimasunut pisiniarfiliaassisartut

Upernavimmi tuniluuttoqarnerani aqqusinermi takussaasutuat ilagaat Knud Inûsugtok. Taanna nuliilu coronavirusimik eqqugaasunut kajumissutsiminnik pisiniarfiliaassisarput.

Nuliani napparsimmavimmi siusinnerusukkut uninnganerata nalaani (coronavirusimiunngitsoq aaqq.) ikiornissaanut nalorninikuunerminit ikiuunnissamut isumassarsiaraa.

- Qanoq ikiornianissaa assut uannut eqqarsarnarsimavoq. Taava corona takkuteriataarmat eqqarsarpunga "mattusimasut coronartullu qanormita ikiorsinnaavagut?", immaqaliaasit pisiniarfiliaattaqattaassinnaagigut, Knud Inûsugtok oqarpoq.

AAMMA ATUARUK Tunillanneqarsimasutut paasineqartuni 104-ni 81-it Upernavimmiittut: Illoqarfimmi tassani tuniluuttoqartorujussuusoq

Taakkulu ullut tamaasa maanna pisiniaussisaqattaarput.

- Igalaakkut matukkulluunniit pisiatik tigullugit aalateringaangamik tuppallernartaqaaq, Knud Inûsugtok oqarpoq.

Piniarfik atuarfillu inoqanngingajattut

Knud Inûsugtok-p Søster Hermerij assigalugu illoqarfik sungiusimasani allarluinnanngorsimanerarpaa:

- Allaaneroqaaq, inuit ataasiakkaannguit naapitassaapput. Siullermik coronaqanngikkallarmat ilaqutariikkaat inuit ataatsimoortut nuannaartut naapittarpagut, maannali taamaattoqanngilaq. Ilaani illoqutigiinni ataaseq pisiniartoq pisiniarujussuarluni takussaapput. Qangatut inunnik pisiniarfinni naapitassaqarpianngilaq, taanna oqarpoq.

Meeqqat atuarfiani meeqqanik naapitassaqanngitsoq Søster Hermarij oqaluttuarpoq.

- Sooraarlunga angerlalerlunga suleqatiga avissaarlugu ingerlagama aqqutiga sumilluunniit inoqanngilaq. Ullaaq aamma arfineq-pingasunut atuarfimmut suliartoraluarpunga atuarfimmut kisianni takkuttoqanngimmat qulingiluap-qeqqa angerlarpunga. Inoqanngilaq taamaallaat biilit sanioqquttarput inoqanngiivipporlu.

Nunatsinni coronavirusi pillugu
killiffik

Tunillatseqqasut 300  
Ullumi tunillatsittut 124  
Siullermik kapitissimasut 71%  
Aappassaa kapitissimasut 66%  
Tunillanneqarsimasut 1456  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Novembarip 29-at 13:15
 

Coronavirusimik tunillatsinissaq pinaveersaaruk