Upernavimmi killilersuutit arlallit atuuttut

Upernavimmi coronamik tuniluunneq killilersimaarniarlugu Avannaata Kommuniata killilersuinerit makku nittartakkamini maluginiaqquai:

• Utoqqaat illuannut pulaarneq matoqqavoq

   

• Innuttaasunik sullissivik ammavoq taamaattorli inuttaasut saaffiginninniarunik oqarasuaat atorlugu 38 78 84-mut saaffiginnissapput.

   

• Prinsesse Margrethe-p atuarfia matoqqavoq, meeqqat angerlarsimaannassapput. Meeqqat nappaammut ersiutillu misissortissapput.

   

• Meeqqeriviit meeraaqqeriviillu matoqqagallarput, tamatumunnga pissutaavoq sulisut misissortinnissaat.

   

• Illoqarfimmi orpiup ikinnera taamaatsippoq

   

• Katersuuffiusinnaasuni allani aamma katersuunnerit pinaveersaartinneqassapput, assersuutigalugu bingo/banko, julefrokostit, aaqqissuinerillu allat 

Angajoqqaat inuiaqatigiinnut pingaarutilimmik suliffillit sulisariaqartut sulisinnaaniassammata, meeqqat atuarfianni atuartuutilinnut pisariaqartitsinermi meeqqanut paaqqinnittarfimmik pilersitsisoqartoq, kommuni allappoq.

1. klassimit 7.klassi tikillugu atuartut tassani pineqarput.

Timersortarfimmi mississuisarfimmik pilersitsisoqarpoq, misissortittussalli amerlammata, tunuleriiaattut amerlasinnaasut, kommuni paasissutissiivoq. Taamaammat innuttaasut misissortinnissamut sivisuumik utaqqisoqarsinnaaneranut paasinnissinnaanissaat Avannaata Kommuniata kissaatigaa.

Naalakkersuisut killilersuutaat, soorlu assersuutigalugu tamanit ornigarneqarsinnaasuni akiuussutissamik kapineqarsimanermut uppernarsaat takutitsinissaq, suli atuuttut kommuni aamma allappqo.

Suliniutigineqartunut nutaanut tunngatillugu Avannaata Kommunianit ingerlaavartumik paasissutissiisoqartassaaq.

Upernavimmi ataasinngornermi nalunaaqutaq ulloqeqqaniit marlunngornermut ulloqeqqata tungaanut misissortittuni 81-it tunillatsissimasut Nunatsinni Nakorsaaneqarfik marlunngornermi allappoq. Tassalu illoqarfimmi tassani tuniluuttoqartorujussuuvoq.