Tunillanneqarsimasutut paasineqartuni 104-ni 81-it Upernavimmiittut: Illoqarfimmi tassani tuniluuttoqartorujussuusoq

Nunatsinni coronavirusimik tunillanneqarsimasutut paasineqartut ataasinngornermi nalunaaqutaq ulloqeqqaniit, marlunngornermut ulloqeqqata tungaanut katillutik 104-pput.

Amerlanerit Upernavimmeersuupput, inuit 81-it tunillatsissimasutut tassani paasineqarmata. Illoqarfimmi tassani tuniluuttoqartorujussuusoq tassa paasinarsivoq. Misissortittut akornanni inuit tallimaagaangata ataaseq tunillanneqarsimasutut paasineqartarpoq, soorlu illoqarfinni allani aamma taamaattoq amerlanerit meeraapput.

Nunatta Nakorsaaneqarfiata kisitsisaataani tamanna takuneqarsinnaavoq.

Illoqarfimmit illoqarfimmut allamut angalasimasut akornanni aamma tunillatsissimasoqarpoq.

Soorlu illoqarfinni allani taamaattoq tunillanneqarsimasut akornanni amerlasuut meeraapput. Tuniluunnerujussuup iliuuseqarfigineqarnissaa pillugu suliniut nutaaq ullup ingerlanerani aallartinneqartoq, Nakorsaaneqarfiup allaaseraa, tamannalu pillugu paasissutissanik piaarnerpaamik saqqummiussisoqarumaartoq ilanngullugu oqaatigalugu.

Inuit 20-t Nuummi tunillanneqarsimasutut paasineqarput. Ataaseq Qeqertarsuatsiaaneersuuvoq, nunaqarfimmilu tassani tamanna pillugu suliniuteqartoqaleruttorluni.

Tunillanneqarsimasutut paasineqartut arlallit Air Greenlandip timmisartuanut GL 205-imut ilaallutik Upernavimmiit Ilulissanut novembarip ulluisa 18-ianni angalasimapput.

Tunillaneqarsimasoq ataaseq timmisartumut GL 3497-imut ilaalluni Ilulissanit Sisimiunur novembarip ulluisa 21-anni angalasimavoq.