Coronap ilungersuatitsinerata Royal Greenland 39 milliuunit koruuninik amigartooruteqartikkaa
Coronap nunarsuup ilarujussua matoqqatippaa. Suliffeqarfiit matoqqapput ikinnerusullu neriniartarfinnut neriartortarlutik.
Taamaammat aalisakkanik qalerualinnillu atuineq annikinnerullunilu Royal Greenlandimut eqquivoq.
Siorna ukiup affaani siullermi 141 millionit koruuninik sinneqartooruteqarneq 39 millionit koruuninik amigartooruteqarfiulersoq, ingerlatseqatigiiffiup ukiup affaani siullermi naatsorsuutaani allassimavoq.
- Suliffeqarfittut taamaallaat nunat assigiingitsut akornini niuffaffinni tuniniaasutut inissisimanermi suliffeqarfiullu tunisaasa affaat sinnerlugit nerisassanut sullissinernut nerisassanik suliffeqarfinnut allanut suliareqqitassatullu tunisaqartutut Royal Greenlandip angusai Covid-19-imit sunnerneqarput, Royal Greenland tusagassiuutinut nalunaarummi allappoq.
AAMMA ATUARUK Akileraannginnermi 27,3 millionit koruunit: 2019 Royal Arctic Line-mut ukioq iluatsitsiffiulluarpoq
Taamaammat raajat qalatanik qalipaajarneqarsimanisullu pineqartillugit ukiuni siuliini ajunngitsumik ineriartortoqaqqinnissaa aamma periarfissinneqanngitsoq, Royal Greenland paasissutissiivoq.
- Pingaartuuvoq Asia ingammillu Kinami niuffaffik, Royal Greenlandip annerpaamik tunitsivia ukiup affaata kingulliup ingerlanerani pisarnermisut ilissasoq, tassanilu pingaartuuvoq erseqqissassallugu tunisassiat Kalaallit Nunaanninngaanneermata taamalu Covid-19-qarfiunngitsumeerlutik, Royal Greenland paasissutissiivoq.
Kaaviiaartitat siornamut naleqqiullugit 9 procentimik apparput. Tamanna 15 millionit koruuninik appariartoqarnerata assigaa.
Siuarialaartoqartoq
Nerisassanik sullissisunut tunisassiorfinnullu attuumasunut tunisineq ukiup qaammataani siullerni sisamani sakkortuumik eqqorneqarsimagaluarluni niuffaffimmik ammaassiartuaarnerup siorna tunisinerup annertussusaa qanilliartortippaa.
Saattuanniarnerup aallartinnera pitsaaqutaasunut ilaasoq, Royal Greenland paasissutissiivoq.
AAMMA ATUARUK Royal Greenland ukioq manna miliuuninik pingasunik kisitsitalinnik annaasaqassangasoq
Akileraannginnermi angusat 228 millionit koruuninit 31 millionit koruuninut apparput. Royal Greenlandili kilisaatit marluk siorna tuninerat 141-t millionit koruuninik immikkut isertitaqassutigai.
Nammineq aningaasaatit 1,7 milliardit koruuniupput.
