Akileraannginnermi 27,3 millionit koruunit: 2019 Royal Arctic Line-mut ukioq iluatsitsiffiulluarpoq

Royal Arctic Line sapaatip akunnera kingulleq nalinginnaasumik ataatsimeersuarfiuvoq, tassanilu ukiumoortumik missingersuutit saqqummiunneqarpoq.

Ukioq 2019 akileraannginnermi 27,3 millionit koruunit angusaqarfiuvoq. Angusaq ukiup siulianit pitsaaneruvoq. Umiarsuaatileqatigiiffiup 2018-mi akileraannginermi 24,1 millionit koruunit sinneqartoorutigai. Taakkualu naatsorsuutigisimasamit pitsaanerupput.

Angusarissaarnermut angallafikkuminarnera peqqutaasunut ilaavoq.

- Sila 2019-mi angalaffigiuminakulasimaqaaq - sinerissami pajuttaatit umiarsuillu atlantikukkkoorutit pilersaarutimik 90 procentii sinnerlugu naammassisinnaallugit, RAL paasissutissiivoq.

- Ukiup annersaani silagittarsimanera, angalaffigiuminakulasimaneranut peqqutaaqataavoq, umiarsuillu aamma ajoqusernerisa ikilineri taavalu anorersuit avaqqullugit ingerlaarnissamut pilersaarusiortarneq angusarissaarnermut iluaqutaapput.

- Angusat taamaalillutik Royal Arctic Line ukioq tamaat naatsorsuutigisimasaanit 5 aammaa 10 milliuunit koruunit akornanniittunit malunnartumik pitsaanerupput, Royal Arctic Line-llu 2019-imi angusat tamaalilluni naammaginarluinnartutut isigai, RAL allappoq.

Umiarsualiornerit kinguaattooqqasut

Umiarsuaatileqatigiiffik aamma nunaqarfiliartaatissanik Spaniami umiarsualiortitsivoq. 

Umiarsualiortiternerli coronali peqqutigalugu kinguaattooqqavoq. Umiarsuit ukioq manna kingusinnerusukkut  aappaagulu tigujumaarlugit, umiarsuaatileqatigiiffiup naatsorsuutigaa. 

Royal Arctic Linep umiarsuartaava, Tukuma Arctica, Kinami sanaaq nunatsinnut kingullertut tikippoq.

Umiarsuaq Royal Arctic Line-p Islandimi umiarsuaatileqatigiiffimmut Eimskipimut suleqatigiinnissamut isumaqatigiissutaanut atatillugu atorneqassaaq.