Coronamut malittarisassat qasukkarmata: Volleyball GM-mut piareerpoq

Volleyballertartut kattuffianni KVK-mi nuannattoqarpoq kommunet arlallit peqataaffigisaannik aaqqissuussinermut malittarisassat qasukkartinneqarmata.

Maniitsumi martsip 31-niit apriilip pingajuata tungaanut GM-rtoqassaaq pilersaarutaagaluartutut Kangaamiuni pinnani.

- Corona pissutigalugu katersuussinnaanermut malittarisassat nutaat najoqqutaralugit ajoraluartumik Kangaamiuni GM-rtitsisinnaanngilagut aaqqissuussat annertunerusut illoqarfinni aalajangersimasuni taamaallat pisinnaammata, KVK-mi siulittaasoq Aalipaaraq Kreutzmann KNR-mut oqarpoq.

AAMMA ATUARUK Nunaqarfimmi aatsaavik GM-rtoqalerpoq

Pissartanngorniunnerit maajip aallartilaarnerani pisussatut KVK-mit pilersaarusiorneqaraluarput inuit atkersuussinnaanerannut malittarisassat atornnaartut apriilip naanerata tungaanut atuuttussaagaluarmata.

Angalanissat

Maannali ukiorpassuarni ileqquusoq tassa porskip nalaani GM-rtoqartarnera atuutileqqittussanngorunarpoq piumassuserinngisamik ukioq ataaseq atuutinngereerluni. GM-rtoqalerpormi.

- Assorsuaq tamanna nuannaarutigaarput. Ilaasortatta nalunaarut aamma nuannaarutigisorujussuuaat, Aalipaaraq Kreutzmann oqarpoq.

Volleyballertartut peqatigiiffii tamarmik Maniitsumi GM-rnissamut qaaqqusaareerput.

- Neriuppugut qaaqquneqartut tamarmik Maniitsumut apuussinnaassasut. Pisinnaajunnaartoqassappat Maniitsoq pissartanngorniuffiusussatut piareersimatereerparput. Maanna tullinnguuppoq angallanniarnikkut peqataasussat tamarmik Maniitsumut apuunnissaasa qulakkeernissaa, Aalipaaraq Kreutzmann oqarpoq.

GM-qataasussat arnani angutinilu iligiit sisamaanngikkunik tallimaassasut KVK-mit naatsorsuutigineqarpoq.

Kommunimit kommunimut allamut angalalluni aaqqissuussinernut nalunaaqqaarluni peqataaffigineqarneqartussanut peqataajartornissaq maannamut inerteqqutaasimagaluarpoq.

Kommuninut allanut angalalluni aaqqissuussinernut peqataanissamut qasukkaanerit apriilip ulluisa 18-iata tungaanut atuupput. Tamatumali pisinnaanissaanut tallimanik piumasaqaateqarpoq, aaqqissuussinerillu illoqarfinni ukunani kisimi pisinnaapput:

• Ilulissat, Aasiaat, Qasiannguit, Qeqertarsuaq, Kangerlussuaq, Maniitsoq, Sisimiut, Nuuk, Paamiut, Narsaq, Narsarsuaq aamma Qaqortoq. 
• Aaqqissuussisoqarnissaanut ullut 30-t sioqqullugit illoqarfimmi aaqqissuussiffiusussami tunillatsissimasumik uppernarsaasoqarsimassanngilaq.
• Aaqqissuussineq 50-init amerlanerusunit peqataaffiussappat tamanna Nakorsaaneqarfimmit akuerineqaqqaassaaq. Isiginnaartussat naatsorsorneqartunut ilaassapput.
• Tamatuma saniatigut aaqqissuussisoqarnissaanut ullut 14-it kingulliit iluanni tikittut peqataqqusaanngillat. Inuit ullut 14-it kingulliit iluanni tikittumut qanillisimasut aamma peqataaqqusaanngillat.
• Illoqarfimmi aaqqissuuffiusumi tunillatsissimasumik naammattuuisoqarpat aaqqissuussinermut peqataasut namminneq kommunerisaminnut aallartinnatik coronamik tunillatsissimannginnermut uppernarsarneqaqqaassapput.