Nunaqarfimmi aatsaavik GM-rtoqalerpoq
Volleyballimi GM-rtoqarnerani aallartitseriarneq siulleq Kangaamiuni maajip 13-at pissaaq.
Ukioq ataaseq sinnerlugu uninngareernermi pisoq siulliuinnarani GM-qartarnerani oqaluttuarisaanermut ilanngutissaaq.
Katerinnissamut malittarisassat
Inuit amerlanerpaamik 100-it 2021-mi apriilip ulluisa 30-ata tungaanut illup iluani katersuussinnaapput. Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
- GM-rfiusussat kattuffitsinni ataatsimeersuarnermi inissinneqartarput. Siornatigut eqqartortareerparput piffissanngulinnginnersoq Kangaamiuni GM-rtoqarnissaa ukiorpassuarni Kangaamiormiut GM-mut peqataasareermata, volleyballertartut kattuffianni KVK-mi siulittaasoq Aalipaaraq Kreutzmann KNR-mut oqarpoq.
Kangaamiuni unnuiffiusinnaasut killeqarput. Taamaammat aaqqissuisut neriuutigaat unammiartortut atuarfimmi najugaqarsinnaassasut..
Periarfissap aappaa
Aalipaaraq Kreutzmannip erseqqissarpaa aatsaat GM-rtoqarsinnaasoq taamanikkussamut kommunenit assigiinngitsuneersunik peqaasoqarluni aaqqissuussisoqarsinnaalersimassappat.
Ullumikkummi corona pillugu malittarisassat naapertorlugit kommunerinngissami aaqqissuussanut nalunaaqqaarluni pisunut peqataajartortoqarsinnaanngilaq
- Aamma aalajangiunnikuuarput GM Maniitsumi pisinnaassasoq Kangaamiunut aqqutit ajornakusoorpallaassappata, Aalipaaraq Kreutzmann nassuiaavoq.
AAMMA ATUARUK Arsartartoq pissartanngorniunnissat taamaatinneqarnerat pillugu: Mamaatsoornaq
Siornatigut inuusuttuaqqat Kangaamiuni GM-rtinneqareerput nunaqarfiullu iligiivi KT-VI arlaleriarlutik inersimasuni pissartaasarlutik.
Inuit katersuussinnaanerannut killilersuutit sivitsorneqassappata KVK piareersimasut GM-qarnissaanut immikkut akuersisoqarnissaanut qinnuteqarnissaminut.
- Avannaa kujataanilu eqqarsaatigalugit kommunekkaartumik unammisitsinissat pitsaasuunngillat taakkunani klubbit ikittuinnaammata. Tassami klubbit amerlanersaat Nunatta qeqqaneersuupput, Aalibaaraq Kreutzmann oqarpoq, nangillunilu:
- Kisianni Maniitsormiut Nuummiullu imminnut unammisinnaanngillat kommuneqatigiinnginnamik. Taamaattunik kommunekkaartumik unamminissat uagutsinnut akunnapput, Aalipaaraq Kreutzmann oqarpoq.