Coronamik tunillatsittoqareersoq: Inatsisartut ataatsimiissinnaajunnaarallartut

Corona virusimik Aasianni tunillatsittumut attaveqarsimasoq Inatsisartut aningaasaqarnermut akileraartarnermullu ataatsimiititaliaannit ippassaq ataatsimeeqatigineqarpoq.

AAMMA ATUARUK Tunillatsissimasup corona pillugu malittarisassat malissimanngilai

Aasianni tunillatsittoqarnerata kingorna ataatsimiititaliami ilaasortat arfineq marluusut tamarmik angerlarsimaannartariaqarput. Taamaammat Inatsisartut inersuarmi ataatsimiissinnaanngikkallarput.

- Ataatsimiinneq inersuarmi aallarteqqissappat taakkua ataatsimiititaliamut

ilaasortat pineqartut pinngitsoornatik inersuarmi peqataasinnaalernissaat utaqqissagipput naatsorsuutigaara, Inatsisartut siulittaasuat, Vivian Motzfeldt KNR-imut oqarpoq.

Oqaluuserisassat kinguartinneqassappat?

Taanna aamma Inatsisartut siulittaasoqarfiata pisut ullormiit ullormut malinnaaffigigai oqarpoq.

Inatsisartut ullumikkut ataatsimiinngitsoorput. Oqaluuserisassat ukiaanerani ataatsimiinnermi kingusinnerusumut kinguartinneqassanersut ukiuuneraniluunniit ataatsimiinnissamut nuunneqassanersut siulittaasoqarfiup tamarmiusup misissussagaa, siulittaasoq oqarpoq.

- Kinguartinneqarsinnaasut kinguartinneqarumaassanersut immaqaluunniit ataatsimiinnerup sivitsorneqarnissaa, taakkua periarfissat tamarmik piupput, Vivian Motzfeldt oqarpoq.

Taassuma angerlarsimasussaatitaanermi malittarisassat malinneqarsimannginnerat ajuusaarutigaa.