Coronamik tunillatsissimasumut qanimut qanillisimasut ulluni 14-ini angerlarsimaannartassasut
Coronamik tunillatsissimasumik nunatsinni maanna uppernarsarneqarsimasoqanngilaq.
Tunillatsissimasunilli piffissap ingerlanerani takkuttoqaqqissaaq, taamaattoqarpallu malittarisassat nutaat tunillatsissimasumut qanimut qanillisimasunut atuutissapput.
Coronamik tunillatsissiamsumut qanimut qanillisimasut ulluni 14-ini angerlarsimaannartalissapput. Taakku sapaatit akunneri marluk qaangiutereerpata coronamillu tunillatsissimannginnermut uppernarsaateqalereerunik aatsaat aneqqissinnaassapput.
- Tuluit Nunaanniit coronavirusip allanngornerata siaruaannerata aammalu februaarip qiteqqunnerata nalaani Danmarkimi atugaanerpaasussatut naatsorsuutigineqarnerata malitsigisaanik taamaaliortoqarpoq, peqqinnissamut naalakkersuisoq, Anne Wangenheim (D) oqarpoq.
Qanimut attavigisimasoq kinaava?
Tunillanneqarsimasinnaasunik ujartuinermi attavigineqarsimagaanni ilisimatinneqarsimagaannilu qanimut attaveqarfigisimasaasarpoq.
Taamaammat tunillatsissimasup saniani qeqqisimaannarluni qanimut attaveqarfigisimasaasariaqanngilaq.
Qanimut attaveqarfigisaanillu assigiinngitsunik pissuteqarsinnaavoq.
Corona pillugu allattoqarfik tunillatsissimasinnaasunik ujartuinermut atatillugu inunnut sianerluni tunillatsimasumut qanimut attaveqarsimasuunermik nalunaaruteqartarpoq.
Paasissutissarsiffik: Corona pillugu allattoqarfik
Tunillatsissimasumut qanimut qanillisimasut siusinnerusukkut ullut arfineq-marluk qaangiunneranni misissortittaraluarput.
AAMMA ATUARUK Akiuussutissat piumaneqangaatsiartut: Naatsorsuutigisamit arriinneruvoq
Angerlarsimaannartussaanermi angerlarsimaannartoqassaaq nerisassarsiniarnermilu taamaallaat pisiniarfiliartoqarsinnaalluni. Pisiniarfiliartut anersaartuutinut illersuuteqassapput – taamaalilluni Danmarkimit nunaniilluunniit allanit tikittunut ulluni tallimani nalinginnaasumik angerlarsimaannartussaanermut malittarisassat asserluinnai atuutissallutik, Corona pillugu allattoqarfik paasissutissiivoq.
Tuluit Nunaanneersoq tuniluutiasoq
Tuluit Nunaannit coronavirus allanngortoq Danmarkimi maanna siaruariarorpoq. Taanna coronavirusimit ilisimariikkatsinnit ulorianarnerunngilaq, tunillaatianarullunili. Taanna 50-init 70-imut tunillaatianerusinnaavoq.
Tuluit Nunaanni allanngortoq pissutigalugu nunatsinnut aqqut decembarip ulluisa 30-anni matuneqarpoq.
Nunatsinnut isernissamut inerteqquteqartitsineq februaari ilanngullugu atuuppoq.
Suliffeqarfiit angalanissamut immikkut akuersissuteqarfigineqarnissamut qinnuteqarsinnaasinnaapput. Nunatsinnulli timmisartukkut angalanissamut februaarip ulluisa 28-at ilanngullugu billetsersisinnaasoqanngillarpoq.
Tikinneq ajuleqqasut angerlaqqissimalersut
Inuit 1700-it missaanniittut juullikkunni nunatsinnut angasoqarnissaata ukiortaanngitsiartoq inerteqqutigineqalinnginnerani Danmarkimut aallarsimapput. Aallarsimasut 1700-it tamarmik maanna tikeqqissimalerput – tikittussat kingulliit tallimanngormat tikittut, Anna Wangenheim paasissutissiivoq.
Suliaq sivisullunilu ajornakusoortoq, taassuma oqaatigaa.
- Taakku Danmarkimi tunillatsinnissaat pinaveersaarniarlugu piaarnerpaamik angerlartikkusussimavagut. Illuatungaanilu nunatsinni tunillaassuuttoqaleratarnissaata aarlerinannginnerpaatinnissaa aamma qulakkeertariaqarlutigu.
Nunatsinnut juullikkunni tikittut coronamik tunillatsissimasut arlaqaalupput.
Nunatsinnukartut tamarmik Kastrupimi timmisartumut ikinnginnerminni tunillatsissimannginnermut uppernarsaammik tunniussaqarput, taamaakkaluartorli tikinnerminnit ullut tallimassaanni misissortinneranni tunillatsissimasut paasineqarput.
- Tunillatsissimasut ataasiakkaarput. Taamaakkaluartorli angalasut akisussaaffimminnik tigusilluarsimasut innersuussutinillu malinnissimasut tamarmik qutsavigerusuppakka, Anna Wangenheim oqarpoq.
