Piumasaqaatini nutaani misissortinnerup sivisunerpaamik ullunik pingasunik pisoqaassuseqarnissaa piumasaqaataavoq, angalasussallu Danmarkimi coronamut misissortinnissamut piffissamik inniminniinissaq eqqumaffigilluartariaqarpaat.Assi: Scanpix

Misissortinnissamut malittarisassat nutaat paatsuungassutigivigit? Aallannginninni ullut pingasut sioqqullugit misissortissaatit

Napparsimmavissuarmit nalunaarutit kukkusimapput ulluilu allanngortinneqarlutik. Malittarisassat nutaat arfininngorneq januaarip ulluisa 23-annit atuutilernissaat maanna qulakkeerpoq.

Timmisartumut ilaallutik nunatsinnukarniaruit coronamik tunillatsissimannginnermut uppernarsaammik sivisunerpaamik ullunik pingasunik pisoqaassusilimmik arfininngorneq januaarip ulluisa 23-annit takutitseqqaartalissaatit.

Naalakkersuisut paasissutissiipput.

Misissortinnerup aallarnissamut annerpaamik ullunik tallimanik pisoqaassuseqarnissaa maannamut malittarisassaasimagaluarpoq.

Misissortinnissamut malittarisassat nutaat

Københavnimit aallarnissamut coronamik tunillatsissimannginnermut uppernarsaammik sivisunerpaamik ullunik pingasunik pisoqaassusilimmik arfininngorneq januaarip ulluisa 23-at aallarnerfigalugu takutitsisoqartalissaaq.

 

Taanna siusinnerusukkut sivisunerpaamik ullunik tallimanik pisoqaassuseqarsinnaagaluarpoq.

 

Nunatsinni misissortinnissamut malittarisassat allanngunngillat. Tikinnermit ullut tallimassaani suli misissortittoqartassaaq.

Malittarisassallu nutaat taakkulu qaqugu atuutilissanersut paatsuungassutigineqarsimavoq:

Tamatumani malittarisassat nutaat ullulerneqanngitsut tusagassiortunik qaammat una katersortitsinermi saqqummiutilaarneqarnerat ilaatigut pissutaavoq.

Napparsimmavissuarmut "attaveqaqatigiinnerlunneq"

Aamma Danmarkimi misissortinniarlutik piffissamik inniminniiniartut napparsimmavissuarmit misissortinnerup sivisunerpaamik ullunik pingasunik pisoqaassuseqarnissaanik sapaatip akunnerata siulianili kukkusumik nalunaarfigineqarsimanerannik ilaatigut pissuteqarpoq.

- Uagut napparsimmavissuullu akornanni attaveqaqatigiinnerlussimavugut. Tamanna maanna unippoq, corona pillugu allattoqarfimmi aqutsisoq, Nels Ulrik Vinther oqarpoq.

AAMMA ATUARUK Naalakkersuisut: Man kan ansøge om indrejse i februar

Napparsimmavissuarmit kukkusumik nalunaaruteqartoqarnerata kingunerisaanik inuit qassiiusut paatsuungallutik Danmarkimi misissortinnissaminnut piffissartik allanngortissanerlugu allattoqarfiup Nuummi sianertarfianut paasiniaasimapput.

Pingajuattut malittarisassat nutaat februaarip ulluisa aallaqqaataanni atuutilerumaartut Naalakkersuisut siusinnerusukkut nalunaarutiginikuuaat.

Tamannali maanna januaarip ulluisa 23-annut allanngortinneqarpoq, tamanna Danmarkimit utertussat amerlanerpaartaat nunatsinnut januaarip ulluisa 22-anni tikereersimanerannik pissuteqarpoq.

Nunatsinnukartunut februaarimi matoqqassasoq

Danmarkimi corona pillugu pissutsit pissutigalugit nunatsinnut angalanerit februaari ilanngullugu tunngaviusumik matoqqavoq.

Februaarimili nunatsinnukarnissamut immikkut ittumik akuersissuteqartoqarnissaanut qinnuteqarnissaq periarfissaavoq. Piumasaqaatini nutaani misissortinnerup sivisunerpaamik ullunik pingasunik pisoqaassuseqarnissaa piumasaqaataavoq, angalasussallu Danmarkimi coronamut misissortinnissamut piffissamik inniminniinissaq eqqumaffigilluartariaqarpaat.

Nunatsinnut tikinnerup kingorna covid-19-imut misissortinnissamut ulluliunneqartoq allanngortinneqarsinnaanngilaq.

Misissortinneq taanna tikinnermit siusinnerpaamik ullut tallimassaani pisinnaavoq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 19.065
  Tunillanneqarsimasut
30
  Peqqisseqqittutut nalunaarutigineqartut 30
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: Nunatsinni Nakorsaaneqarfik
  Nutarterneqarnera:
  februaarip 24-at 2021 nal. 11:00