Coronamik tunillatsissimasoq Nanortalimmiittoq ajunngilaq ersiuteqaranilu
Inuk ataaseq Nanortalimmiittoq coronavirusimik tunillatsissimasutut sapaatip-akunnerata ataatsip matuma siorna uppernarsarneqarpoq.
Tunillatsissimasoq ajunngitsoq nunattalu kujataata ilaani mattusimasoq, nakorsaaneq, Henrik L. Hansen oqarpoq.
- Pineqartoq peqqippoq nappaammullu maannakkut ersiuteqanngilaq, Henrik L. Hansen oqarpoq.
AAMMA ATUARUK Politiet undersøger corona-forløb i Nanortalik
Taanna tunillatsissimasutut nunatsinni uppernarsarneqartut 14-eraat.
Nuuk
Paamiut
Sisimiut
Maniitsoq
Qaqortoq
Narsaq
Aasiaat
Qasigiannguit
Qeqertersuaq
Ilulissat
Kangerlussuaq
Narsasuaq
Umiarsuaq tunillatsissimasup ilaaffigisaa Hetairos tissiartaataasoq nakorsaanerup paasissutissiissutigaa. Umiarsuarsuaq ilisimatusaataasoq nunatta kujataanut sapaatip-akunnerata siuliani talippoq.
- Umiarsuaq tissiartaataavoq, inummit pigineqartoq. Taanna Tuluit Nunaanninngaanniit Island aqqusaarlugu Nanortalimmukarpoq, nakorsaaneq paasissutissiivoq.
Mattusimanissamik malinninngitsoq
Umiarsuaq Nanortalimmit aallaqqereerpoq, angalanissaminilu sivisuumi nunatta kujataanut aqqusaaginnarsimasoq, nakorsaaneq oqarpoq.
Tunillatsissimasoq ersiuteqanngilaq, Nanortalimmulli tikinnginnermini marloriarluni misissortereersimalluni.
Taamaakkaluartoq Nanortallip peqqissaaviani misissortikkami tunillatsissimasoq paasineqarpoq. Tunillatsissimasup mattusimanissamut malittarisassat malinnagit peqqissaavimmi misissortinnermi kingorna illoqarfimmi angalasimavoq.
Taamaaliortoqaqqusaanngilarlu.
AAMMA ATUARUK Coronamik tunillatsissimasoq Nanortalimmi mattusimasimanngitsoq
Illoqarfinnimi minnerusuni nunaqarfinnilu coronamik misissortinnerup akissutersinissaata tungaanut inuit akornanni angalaqqusaasoqanngitsoq (ilaatinneqanngitsut paasissutissaasivimmi takukkit) malittarisassaniippoq. Misissortinnerup akissutersinissaanut angerlarsimaffimmi utaqqisoqartussaavoq allanullu attaveqarnaveersaartussaalluni.
Suliaq politiinit maanna misissuiffigineqalerpoq.
- Suliaq misissuiffigileruttorparput, naliliiffigineqassallunilu tamatumalu kingorna aalajangiiffigineqassallu. Suliaq suli aalajangiiffigineqanngilaq, aalajangiisoqarpallu soorunami pineqartoq siulliullugu attavigineqassaaq suliallu qanoq naammassineqarneranik paasitinneqarluni, politiit KNR-imut allapput.
