Coronamik tunillatsissimasoq Aasianniittoq: Sisimiuni atuartut 80-it angerlartinneqartut

KTI-p sanaartornermut immikkoortortaani atuartut eqimattat nutaat angerlartinneqarput.

Atuartut katillugit 80-it ullaaq manna angerlaqqeqquneqarput. Atuartunit nutaanit ataatsip tunillatsissimasoq Aasianniittoq qanillisimasimammagu angerlartitsisoqarnissaa atuarfiup aalajangerpaa, forstanderi, Jokum Møller nassuiaavoq.

- Mianersorniarluta atuartut angerlartinneqarnissaat aalajangerparput, forstanderi oqarpoq. 

Pingasunngornermi ualisoq tunillatsissimasumik nutaamik Aasianni uppernarsaasoqarpoq. Taassuma nunatsinnut tikinnerminit ullut tallimat qaangiunneranni misissorteqqinnerani tunillatsissimasoq paasineqarpoq.

AAMMA ATUARUK Nyt tilfælde af covid-19 i Aasiaat

Tamatuma kingornatigut tunillatsissimasup corona pillugu malittarisassat malissimanngikkai paasineqarpoq. Pineqartoq angerlarsimaannarnermini misissorteqqinnerminiillu akissutersinnginnermini pulaartoqarsimavoq.

Taamaammat tunillatsissimasup inuit allat tunillassimasinnaavai.

Atuartut mianersornissaq tunngavigalugu angerlartinneqartut forstanderip nassuiaatigaa.

Atuarfiup Nakorsaaneqarfik siunnersorneqarnissaq pillugu maanna attaviginiarpaa. Forstanderip atuartut misissortikkusuppai taamaalillunilu isumannaanneruniarluni.

- Taama pisoqarnissaanut piareersimareernikuuvugut. Imaanngilaq tunillatsissimasoqarnissaa ilimagigipput, kisianni mianersorniarluta taamaaliorpugut, Jokum Møller oqarpoq.

Angertinneqartut atualeqqammertuusut forstanderip oqaatigaa.

Aningaasaqarnermut ataatsimiititaliami ilaasortat angerlarsimaannartut

Inatsisartut Aningaasaqarnermut ataatsimiititaliaani ilaasortat maanna angerlarsimaannaqqusaalersut ippassaq saqqummiunneqarmat tunillatsissimasumik Aasianni uppernarsaasoqarnerani suliaq annertuneruleriartulerpoq.

Tunillatsissimasummi corona pillugu malittarisassat malissimanngilai – inuk pineqartoq tunillatsissimasumut Aasianni pulaarsimasoq, pulaarermi kingorna Nuummukarpoq, taannalu Aningaasaqarnermut ataatsimiititaliami illoqarfiit pingaarnersaanni pingasunngornermi ualikkut ataatsimiippoq.

AAMMA ATUARUK Corona pillugu malittarisassat unioqqutinnerisa kingunerat: 3-4.000 koruuninut akiligassiineq

Inatsisartut ukiaanerani ataatsimiinnerat taamaammat taamaatinneqarallarpoq.

Aamma Kommune Qeqertaliup borgmesteria, Ane Hansen (IA) angerlarsimaannartitaavoq, taassumami tunillatsissimasumut Aasianniittumut qanimut attaveqartuusoq suleqatigaa.

Nakorsaanerup oqarnera naapertorlugu inuit qulit missaanniittut Aasianni angerlarsimaannaqquneqarput.