Coronamik tunillanneqarsimasut: 320-t nutaat tunillanneqasimasut

Nunatsinni coronavirusimik tunillanneqarsimasut ukiutoqqamiilli 320-t nassaarineqarput.

Nunatsinni Nakorsaaneqarfik ullumi taama saqqummiussaqarpoq.

Ukiutoqqamiilli misissuinerit ilaat aatsaat qanittukkut naammassineqarmata aatsaat ullumi saqqummiunneqarput.

Nuummi tunillatserlaat 158-iupput. Misissortissimasut katillugit 757-iusut 20,9 procentii tunillanneqarsimapput.

- Tamatuma Nuummi tuniluunneq sukkasuumik anneruleriartortoq ersersippaa, Nunatsinni Nakorsaaneqarfik allappoq.

AAMMA ATUARUK Nakorsaaneq: Omikron Nunatsinnut pisimasoq tunillatsittut takutippaat

Ittoqqortoormiini inuit 29-t coronaviruseqartut paasineqarpoq. Taakku PCR-imik misissukkanit 14-init Nuummut nassiunneqartunit, sukkanerusumillu misissuutaasinnaasunit 65-init paasineqarput. Ittoqqortoormiinit misissukkat allat maanna Nuummukaanneqartut, nakorsaaneqarfik ilisimatitsivoq.

Peqqissaasumik Ittoqqortoormiini napparsimasunik katsorsartinnissamut peqqissartinnisssamulluunniit sullissisinnaasumik Ittoqqortormiiliartoqarpoq.

Aamma Qeqertarsuarmi Kangerlussuarmilu suli tuniluuttoqartoq misissuinerit takutippaat.

Nunatsinni tunillanneqarsimasut kommunikkaarlugit massakkut ima amerlatigipput:

• Avannaata Kommuniani qulit.
• Kommune Qeqertalimmi 16-it.
• Qeqqata Kommuniani 47-t
• Kommuneqarfik Sermersuumi 527-t
• Kommune Kujallermi sisamat.

Inuit marluk Nuummi napparisimmavimmi uninngapput.

Tuniluutipiloorneq

Nunatsinni Omikronimik tunillatsittoqarsimanersoq suli uppernarsineqanngilaq.

- Kisianni Ittoqqortoormiini, Kangerlussuarmi Nuummilu tuniluunneq sukkanerungaatsiartoq uani ersarippoq, Nunatsinni Nakorsaaneqarfik allappoq nangillunilu:

- Tuniluunnerup sukkatsinnera peqqutigalugu peqqinnissaqarfiup Coronamik Akiuinerullu sulinerata allanngortiteriffiginissaa sulinissutigineqarpoq. Taamaaliornikkut tunillanneqarsimasut sapinngisamik sukkanerpaamik akissutissarsisarnissaat, peqqinnissaqarfiullu tunillanneqartunik amerliartortunik naliliisarnissamut nakorsaanissamullu piareersimanissaa qulakkeerniarneqarpoq.

Nunatsinni coronap killiffia pillugu Naalakkersuisut aqagu marlunngornermi januaarip ulluisa sisamaanni nalunaaqutaq marluniit tusagassiortunik katersortitsissapput.