Coronamik pingasut tunillagaasut: Marluk Nuummi ataaserlu Qaqortumi
Tallimanngornermi Qaqortumi inuk ataaseq covid-19-imik tunillatsissimasoq siumorneqarpoq.
Pineqartoq tunillatsisimasut allat assigalugit juulip arfineq-sisamaani Rockhousemiissimavoq, taamaattorli ulluni kingullerni tunillatsisimasut attaveqarfigisimanngilai.
AAMMA ATUARUK Sarfaq Ittuk avannaanut ingerlaqqissinnaasoq - Tunillatsittoqarsimanngitsoq
Nakorsaaneqarfik taama nalunaaruteqarpoq.
Tunillatsissimasut qanimut attaveqartunut maleruagassat
Tunillatsissimasumut qanimut attaveqarsimagaanni ullut arfineq-marluk angerlarsimaannassapput. Taava ullut arfineq-aappassaanni PCR atorlugu misissorteqqissapput, tunillatsissimanngikkaanni angerlarsimaannaqqusaaneq atorunnaarsinnaavoq.
Tunillatsisimasumik qanimut attaveqarsimasut tamarmik ulluni 14-ini Covid-19-ip ersiutaanik immikkut nakkutiginnissapput.
Taamaammat juulip arfineq-sisamaani imerniartarfimmiissimasut tamarmik angerlarsimaannassapput sukkanerpaarlu atorlugu misissortissallutik, nunatsinni nakorsaaneq kaammattuivoq.
Nunatsinni tunillatsissimasut maanna 21-upput. Ilulissani ataaseq, Sisimiuni arfinillit, Nuummi pingasut, Narsarsuarmi marluk, Narsami ataaseq, Qaqortumi arfineq-pingasut.
Nuummi marluk
Nuummi inuit marluk tunillatsisimasut tallimanngornerup unnugaa paasineqarpoq. Tunillatsisimasut Sarfaq Ittummut attuumassuteqanngillat aamma pineqartut angerlarsimaannarput. Tuniluunnerup paasiniarnera aallartinneqarpoq, nakorsaaneqarfik allappoq.
AAMMA ATUARUK Killilersuinerit sivitsorneqarlutillu Qaqortumiit Sisimiuniillu aallartoqaqqusaanngitsoq
Ilutigalugu innuttaasut tamarmik ersiutit immikkut eqqummaariffigissagaat kiisalu nalinginnaasumik innersuussutit malissagaat kaammattorneqarput. Qanillinaveersaarneq, assaat asakulanissaat, taliup peqittarfianut tangajortarnerit kiisalu covid-19-imik ersiuteqartilluni imaluunniit tunillatsissimasumik attaveqarsimagaanni angerlarsimaannarnissaq misissortinnissarlu kaammattuutigineqarlutik.
Arfininngornermi juulip 17-iani misissortinnissamik periarfissat
Nuuk
Inuit tunillatsissimasumut qaninnerminni il.il. tunillatsissimasinnaasut sapaatit akunneranni uani ulluni ukunani Misissuivimmut piffissamik inniminneeqqaaratik ornigussinnaapput:
Arfininngorneq nal. 10.30 – 12.00
Napparsimaguit Dronning Ingridip Peqqissaavia (DIS) tlf. 80 11 11-mut attaveqarfigisinnaavat. DIS-ip misissortinnissamut piffissamik inniminniissussinnaavaatit.
Ullut tallimassaanni misissortinnerit arfininngornermi nal. 08.15 – 10.00 ingerlanneqassapput.
Ilulissat
Inuit tunillatsissimasumut qaninnerminni il.il. tunillatsissimasinnaasut sapaatit akunneranni matumani ulluinnarni misissortissinnaapput. Napparsimmavimmut nal. 11-13 akornanni tlf. 94 34 11-mut piffissamik inniminniigit.
Napparsimaguit nakorsaq oqaloqatiginiarlugu nakorsat oqarasuaataannut 801117-imut attaveqarfigisinnaavat (9.30-10.15). Nakorsap ulluinnarni nal. 13 misissortinnissamut inniminniissussinnaavaatit.
Ullut tallimassaanni misissortinnerit pisarneq malillugu ulloq sioqqullugu inniminniinikkut nal. 09.00 pisarput. Ulluinnaat aamma arfininngornerit tamaasa misissuisoqartarpoq.
Sisimiut
Misissortinnissamut piffissamik inniminniinermi Peqqinnissaqarfik tlf. 86 42 11-mut attaveqarfigineqassaaq.
Sapaatit akunneranni matumani piffissat oqarasuaatikkut saaffiginniffissat pingasunngorneq – tallimanngorneq nal 09 – 15-imut aamma arfininngorneq nal. 10 – 14-imut sivitsorneqarput.
Qaqortoq
Kommune Kujalleq aamma Peqqinnissaqarfik suleqatigiillutik misissortittarfimmik tassa testcenterimik, kikkunnulluunniit pisariaqartitsunut misissortiffigineqarsinnaassumik pilersitsipput.
Tasersuup Atuarfiata eqaarsaartarfiani nalunaaqqutaq 10:00-imiit 17:00-imut misissortikkiartortoqarsinnaavoq.
Arfininngornermi juulip ulluisa 17-anni nalunaaqqutaq 9:00-imiit 16:00-imut misissortikkiartortoqarsinnaassalluni.
Sapaat 18-anni nalunaaqutaq 9:00-imiit 16:00-imut misissortikkiartortoqarsinnaalluni.
MALUGIUK: Misissortittarfik 12:00-imiit 12:30-ip tungaanut matoqqagallartassammat.
