Sarfaq Ittuk avannaanut ingerlaqqissinnaasoq - Tunillatsittoqarsimanngitsoq
Ilaaasunik Paamiuni Nuummilu ullumi misissuisoqarpoq. Paamiuni misissuinerit tamarluinnarmik takutippaat tunillatsittoqarsimanngitsoq.
Taamaattumillu Sarfaq Ittuup pilersaarutit malillugit avannaanut ingerlaqqinnissaa Nunatta nakorsaaneranit akuerineqarpoq, umiarsuarlu Nuummit nal. 20:00 aallassaaq.
Arctic Umiaq Line Facebookikkut taama nalunaaruteqarpoq.
- Ilaasut sinneri Narsami, Arsummi Paamiunilu ikisut Nuup avannaanut angalasut apuuffissaminnut pigunik angerlarsimaannarallassapput, ilaasullu pineqartut najukkaminni misissuisarfimmi ataasinngorpat misissortissapput.
Sarfaq Ittummut ilaasut suli oqartussat maleqqusaat malissavaat, taamaattumik qanermut assiaqutit suli umiarsuarmi atorneqassapput.
- Sarfaq Ittuk avannaanut nalinginnaasumik ingerlaassaaq Sisimiuniilli aallarnermi ilaasunik ikisoqassanngilaq oqartussat Sisimiunit aallartoqannginnissaanik peqqussuteqarnerat pissutigalugu. Ilaasut Sisimiunit aallarnissaminnut billetsillit utertitterusuttut imaluunniit angalanermut pilersaarutiminnik allanngortitserusuttut info@aul.gl-imut saaffiginnissinnaapput.