Killilersuinerit sivitsorneqarlutillu Qaqortumiit Sisimiuniillu aallartoqaqqusaanngitsoq
Killilersuutit marlunngormat atuutilersinneqartut ataasinngornerup tungaanut sivitsorneqarput.
Ilutigisaanik Qaqortuminngaaniit Sisimiuniillu aallartoqaqqusaanngilaq.
Danmarkimut billetsissaqareersut aallarnissaminnut suli periarfissaqarput. Assersuutigalugu Qaqortumiit Danmarkimut aallartoqarsinnaavoq. Tamanna Sisimiunut aamma atuuppoq.
Innuttaasut tamarmik tunillaassuuttoqarnissaanut aarlerinaatit annikillisinniarlugit maleruagassanik eqqumaffiginnilluinnarnissaat innersuussutigineqarpoq:
- Qanillinaveersaarit.
- Assavit eqqiluitsuutinnissaat eqqaamajuk.
- Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.
Tusagassiuutinut sisamanngornermi katersortitsinermi, Naalakkersuisut taama oqarput.
- Tunillatsissimasunik allanik suli nassaartoqanngitsoq oqaatigisinnaavarput. Misissortissimanermut tunngatillugu unammillernartoqarpoq, assersuutigalugu Qaqortumi misissugassatut tiguneqartut suli misissorneqanngimmata. Taakkuli Nuummut nassiunneqarnikuupput, Naalakkersuisunut siulittaasoq Múte B. Egede oqarpoq.
Qaqortumi misissortittut amerlasoorujussuupput. Massakkut misissuinerit 150-it Nuummut nassiussassaapput, Múte B. Egede nassuiaavoq.
Killilersuutit marlunngornerup tungaanut atuutinneqalertussat:
- Inunnit ornigarneqarsinnaasuni - matumani pisiniarfiit ilanngullugit qanermut assiaquteqarnissaq ullumikkumiit ataasinngornerup tungaanut atuuttumik piumasaqaataalerpoq.
- Bussini aqqaneq-marluleereersimasut tamarmik anersaartuutinut illersuuteqassapput, bussinilu issiaviusinnaasunit amerlanerusunik ilaasoqassanngilaq.
- Sisamanngornermiit ataasinngorneq ilanngullugu Qaqortumiit Sisimiuniillu angallanneq matuneqarpoq.
- Ulluinnarni pisariaqartitanut pisiniarfinni inuit amerlassusaat akuerisaasut affai taamaallaat iseqqusaapput.
- Neriniartarfinni imerniartarfinnilu amerlanerpaamik 20-nik isertoqarsinnaavoq. Nuna tamakkerlugu oqaluffinni tamanna aamma atuuppoq.
Ataasinngorneq juulip 19-ianiit piumasaqaatit aamma allanngortinneqarput. Danmarkimiit Kalaallit Nunaannut aallannginnermi misissortissimanermut uppernarsaasiisarneq allanngortinneqarmat. PCR-imik misissortinnerussaaq, annerpaamillu 48 tiiminik pisoqaasuseqassalluni. Misissuut aamma nunat avannarlerneersimassaaq.
Kastrupimi timmisartumut ikinnginnermi coronamik tunillatsissimannginnermik uppernasaammi misissortissimaneq ullunit pingasunit pisoqaanerunnginnissaa siusinnerusukkut piumasaqaataavoq.
Kalaallit Nunaannut tikittut tamarmik katersuuffiusumiinnginnissaat innersuussutaavoq. Naammassillugu kapitissimagaluaraanniluunniit.
Massakkuugallartoq Ilulissani, Sisimiuni, Nuummi, Qaqortumi Narsami Narsarsuarnilu coronavirusertoqarpoq.
