Hollandimi coronap ajornartoortitsinerani killilersuinerit aporaassutaajuarsinnartut
Hollandimi innuttaasut unnuakkut aneqqusaajunnaarsinneqarallarnerat akerliuffiginiarlugu illoqarfinni assigiinngitsuni ullut pingajussaat ataasinngornermi eqqissiviilliortoqarpoq.
Akerliussutsimik takutitsisut politiillu akornanni Amsterdamimi, Rotterdamimi Hollandillu kangisissortaani illoqarfimmi Amersfoortimi aporaattoqarpoq, soorlu aamma Maastrichtip eqqaani illoqarfeeqqami Geleenimi eqqissiviilliortoqartoq.
Inuit arfineq-pingasut Amsterdamimi tigusarineqartut, Amsterdamimi politiit nalunaarutigaat.
AAMMA ATUARUK Hollandimi unnuakkut aneqqusaajunnaartitsinermut akerliussutsimik takutitsisoqartoq
Sapaatit-akunnerata naanerani eqqissiviilliornerit Hollandip ministeriuneranit Mark Ruttemit ataasinngornermi assuarineqarput. Akerliussutsimimmi takutitsisut politiinik ilaatigut saassussipput, assersuutigalugulu coronavirusimut misissuiffimmik aamma ikuallatsitsillutik. I nuit hunnorujulikkuutaat tigusarineqarput.
- Akerliussutsimik takutitsinertut taaneqarsinnaanngillat. Pinerluttuliornertut taaneqarsinnaapput inatsisitigullu malersorneqarumaarput, ministeriuneq Mark Rutte oqarpoq.
Coronavirusip tuniluutilinnginnissaa pillugu Hollandimi innuttaasut unnukkut nalunaaqutaq qulingiluaniit ullaassakkut nalunaaqutaq tallimanut qiteqqunnissaata tungaanut Hollandimi oqartussanit aneqqusaajunnaarsinneqalermalli innuttaasut ilaat sakkortuumik qisuariaateqarfigaat.
Sorsunnersuup kingulliup kingorna nuna tamakkerlugu aatsaat taama aneqqusaajunnaarsitsisoqarpoq.