Corona pillugu ullumikkut kisitsisit: Tunillatsissimasut nutaat 24-t

Nuummi tunillatsissimasut 20-t Sisimiunilu sisamat nutaat paasineqarput.

Nakorsaaneqarfik taama paasissutissiivoq.

Nunatsinni tunillatsissimasut katillugit maanna 141-pput.

Nunatsinni aatsaat taama tunillatsissimasoqartigivoq. Tunillatsissimasut ippassaq 126-upput.

Nunatsinni tunillatsissimasut taama amerlatiginikuunngillat. Tunillatsissimasullu aggustip qiteqqunnerani amerlanerpaagamik 103-upput.

AAMMA ATUARUK Anna Wangeheim corona pillugu: Sooruna tusagassiortunik katersortitsisoqanngitsoq?

Illoqarfiit pingaarnersaanni coronamik tuniluunneq taamaalilluni siammariartuinnarpoq. Nuummi tunillatsissimasut maanna katillugit 133-upput - Nakorsaaneqarfiullu oqarnera naapertorlugu illoqarfimmi sumi tamaani tunillatsittoqarsinnaavoq.

Ulluunerani paaqqutarinniffinnut tallimanut, meeqqat atuarfiinut pingasunut ilinniarfeqarfinnullu atassuteqartunik tunillatsissimasunik nutaanik suli paasisaqartoqartarpoq.

Tunillatsissimasut ilaat tunillaassuisinnaagunarluni Annaassisitta Oqaluffianut sapaatiummat aamma naalagiarsimavoq.

Sisimiuni tunillatsissimasut maanna katillugit arfineq-pingasuupput - taakkunannga sisamat nutaajupput. Atuarfimmi tuniluuffiusutut siusinnerusukkut ilisimaneqareersumi tuniluuttoqarpoq, aammali sumi tunillatsissimaneranik ilisimaneqanngitsunik tunillatsissimasoqarluni.

Tunillatsissimasut ullumikkut amerlassusaat kommunikkaarlugit:

• Avannaata Kommunia: 0
• Kommune Qeqertalik: 0
• Qeqqata Kommunia: Arfineq-pingasut
• Kommuneqarfik Sermersooq: 133-t
• Kommune Kujalleq: 0

Nuummi corona pillugu malittarisassat sapaatip akunnerata siuliani atulersinneqarput. Malittarisassat Nuummi Sisimiunilu atuuttut assigiipput.

Taamaammat neriniartarfinnut, imerniartarfinnut timigissartarfinnullu isissaguit tamakkiisumik akiuussuserneqarsimassaatit. Tamakkiisumillu akiuussuserneqarsimanngikkuit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisinnaassallutit.

Sumiiffiit uku tamakkiisumik akiuussuserneqarsimallutit imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik peqaruit aatsaat iserfigisinnaavatit:

• Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
• Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
• Innuttaasut illui assigisaallu.
• Atuakkanik atorniartarfiit.
• Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit.
• Nujalerisut, tagiartuisartut, pinnersaasarfiit assigisaallu.

Akiuussutissamik kapitisimanngikkuit tunillatsissimannginnermullu uppernarsaateqarnak ukununnga suli isersinnaavutit:

• Pisiniarfiit
• Allakkeriviit
• Mittarfiit
• Pisortani oqartussaasut sulliviillu pilersuiviit kiffartuussinermi saaffiginnittarfii.
• Assartuutit tamanit atorneqarsinnaasut utaqqisarfii.
• Init suliannik ingerlatsivigisassatit.