Anna Wangeheim corona pillugu: Sooruna tusagassiortunik katersortitsisoqanngitsoq?

Nuummi tunillatsissimasut 35-t nutaat ippassaq paasineqarput.

Nunatsinni covid-19-imik tunillatsissimasut taamaalillutik 126-ulerlutik aatsaat taama amerlatigilerput.

Tunillatsissimasut taama amerlatigisimanngisaannarput – taakkunanngalu 121-t Nuummi najugaqarput.

Taamaammat Naalakkersuisut tusagassiortunik katerseqqinnissaat piffissanngortoq, Inatsisartut peqqinnissamut ataatsimiititaliaani siulittaasup tullia, Demokraatinit Anna Wangenheim isumaqarpoq.

Naalakkersuisut kingullermik septembarip ulluisa aappaanni Múte B. Egedep nunatta ammariartuaarnissaanut pilersaarut saqqummiummagu tusagassiortunik katersortitsipput.

Tamatuma kingorna Nuummi tunillatsissimasut amerlangaatsialerput.

Tunillatsissimasut amerlasoorujussuusut

Nuummi tunillatsissimasut septembarip ulluisa aappaanni aqqaniliupput. Ippassarlu oqaatigineqareersutut 121-ullutik. Nuummilu coronapas sapaatip akunnerata siuliani piumasaqaataalerpoq – tassanilu tusagassiortunik katersortitsisoqanngilaq. Tamannalu akuersaarneqarsinnaanngitsoq, Anna Wangenheim isumaqarpoq.

- Nuummi pissutsit immikkuullaripput.

Naalakkersuisut iliuuseqassapput – taakkunanngami oqaaseqartoqanngikkuni taava tamanna akisussaaffiup tamaat inunnut tunniunneqarnera assigaa, Anna Wangenheim isumaqarpoq.

- Innuttaasut covid-19-imik akiuiniarnermut akisussaaffiup innuttaasunut tunniunneqarneranik oqartussat erseqqissaateqarnissaat naleqquppoq.

AAMMA ATUARUK Nuummi aatsaat taama tunillatsissimasoqartigisoq – borgmesterili allanik killilersuisoqartitsiniarnianngilaq

Peqqinnissamut naalakkersuisoq, Kirsten Fencker KNR-imit ippassaq apersorusukkaluarput. Saqqummiinissarpulli sioqqullugu tamanna periarfissaanngimmat allakkatigut akissuteqaannarpoq:

”Covid-19-ip tuniluutinnginnissaanut akisussaaffik tamaniippoq. Qinikkat innuttaasullu akisussaaffeqarput. Taamaammat Peqissutimut Naalakkersuisutut tulluusimaarutigaara; peqqussutit utaqqinngikkaluarlugit nammineq akisussaaffimmik tigusinikkut qanermut assiaquteqarlutik kateriffiusunut isertartut takussaammata”, peqqinnissamut naalakkersuisoq allappoq.

”Naalakkersuisut covid-19-ip tuniluunnerata ineriartornera qanimut malinnaafigiuarpaa; taamaammallu ataavartumik nalilersuisoqarluni pisariaqartillugulu iliuuseqarnissamut piareersimalluta.”

Borgmesteri noqqaassuteqanngitsoq

Kommuneqarfik Sermersuumi Charlotte Ludvigsen killilersuutinik amerlanerusunik atuisoqartitsiniarnissamut aamma pilersaaruteqanngilaq.

- Inuit ataasiakkaat tunillatsinnaveersaarnissaminnut namminneq akisussaaffeqarput, borgmesteri KNR-imut oqarpoq.

- Assatit errortukulakkit, spritti atoruk, qanermut assiaqut atoruk inuillu amerlasuut akornaniinnaveersaarit.

Nunatsinni tunillatsissimasut aggustip qiteqqunnerani amerlanerpaagamik 103-upput.

Nuummi Sisimiunilu sumiiffiit uku tamakkiisumik akiuussuserneqarsimallutit imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik peqaruit aatsaat iserfigisinnaavatit:

• Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
• Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
• Innuttaasut illui assigisaallu.
• Atuakkanik atorniartarfiit.
• Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit.
• Nujalerisut, tagiartuisartut, pinnersaasarfiit assigisaallu.

Akiuussutissamik kapitisimanngikkuit tunillatsissimannginnermullu uppernarsaateqarnak ukununnga suli isersinnaavutit:

• Pisiniarfiit
• Allakkeriviit
• Mittarfiit
• Pisortani oqartussaasut sulliviillu pilersuiviit kiffartuussinermi saaffiginnittarfii.
• Assartuutit tamanit atorneqarsinnaasut utaqqisarfii.
• Init suliannik ingerlatsivigisassatit.

Naqqiut: Peqqinnissamut naalakkersuisoq, Kirsten Fencker aperneqarusunngitsoq ilanngutassiami siusinnerusukkut oqaatigaarput. Tamanna ilumuunngilaq. Taassumali apersorneqarnissaa saqqummiinnginnitsinni periarfissaasimanngiinnarpoq, tamanna ilanngutassiami maanna allassimavoq. KNR-ip kukkuneq ajuusaarutigaa.