COP21-mi Canadap nunap inoqqaavinut tunngasut tamaviaarutigigaluarpai
![](/sites/default/files/styles/image_934x467/public/article_images/cop21_mark_dixon_flickr_1.jpg?itok=agtmJAxF)
Canadap avatangiisinut ministeria Cathrine McKenna ministerinngornerminiiit taamaallaat sapaatit akunneri arlallit qaangiuttullu Parisimi COP21-mut ataatsimeersuariaqataavoq.
Ministeri oqarpoq nunap inoqqaavi taakkununngalu tunngasut isumaqatigiissutip inaarutaanut tamaviaarluni ilanngunniarsimagaluarlugit.
Aamma atuaruk COP 21-imi isumaqatigiissutip nunatsinnut tunngasortaa misissorneqarpoq
Canadamulli angerlarnermi kingorna tusagassiuutini arlalinni apersorneqartilluni oqarpoq, pakatsinartuusoq paasillugu nunarpassuit nunap inoqqaavinut minnerunngitsumillu ilisimasatoqaannut qanoq soqutiginninngitsigisut.
Cathrine McKenna nutaarsiassaqartitsivimmut APTN NEWS-imut oqarpoq piffissarujussuaq atorlugu Parisimi naggueqatigiit Inuit siuttuinik allanik tusarniaasarsimalluni, Nunatsinneersumut Vittus Qujaukitsumut, Nunavumi aqutsisumut Peter Taptunamut ICC-milu nunat akornanni qullersaasumut Okalik Eegeesiammut.
Aamma atuaruk COP21 Parisimi isumaqatigiissummut Kalaallit Nunaat pituttugaanngilaq
Piareersimasimagaluarpoq silap pissusaata allanngoriartornera pillugu isummersuutaat aarlerissutaat qangaaniillu ilisimasaat isumaqatigiissutip oqaasertaanut ilanngunniarlugit, iluatsinngittumilli.
Avatangiisinulli ministeri McKenna oqarpoq oqaloqateqartarnini assut ilinniarfigisimallugit. Assersuutigalugu Peter Taptuna issuarpaa, oqaluttuussimammani Nunavumi utoqqaat maanna qangatut silasiorsinnaajunnaarsimasulluunnit, taamaattumillu amerlasuutigut piniarialussinnartarlutik.
Aamma atuaruk CO2-mik aniatitsinerput ukiut qulit ingerlanerini annikinnerulersimavoq
Taamaattumik Canadap avatangiisinut ministeriata siunissami sulissutigeqqinniarpaa nunap inoqqaavisa isummersuutaat ilaatilerniarlugit, Canadamilu avatangiisinik nalilersuinermi suleriaatsit nutarterlugillu pitsanngorsarniarlugit.
Aamma atuaruk COP21 Qujaukitsoq: Ajornakusoortorujussuarmik isumaqatigiinniarnerit naammassipput