COP 21-imi isumaqatigiissutip nunatsinnut tunngasortaa misissorneqarpoq
![](/sites/default/files/styles/image_934x467/public/article_images/cop21_mark_dixon_flickr_1.jpg?itok=agtmJAxF)
Silap pissusaa pillugu Parisimi isumaqatigiinniarnermi, COP21-mi, danskit kalaallillu isumaqatigiinniartuisa Kalaallit Nunaannut tunngasortaa misissussagaat, nunanut allanut tunngasunut naalakkersuisoqarfiup pisortaata, Kaj Holst Andersenip maanna nalunaarutigaa.
Silap pissusaa pillugu isumaqatigiissut, naalagaaffinnit 196-init akuerineqartoq, Nunatsinni naalakkersuisunit qanoq isummersfigineqarsimanersoq, Vittus Qujaukitsup oqaaseqarfiginiarnangu KNR-imut oqarpoq tamannali pisortamut Kaj Holst Andersenimut tassa isumageqqusimallugu.
Aamma atuaruk COP21-mi Issittormiut ataatsimoorput
Parisimi isumaqatigiinniarnermi Nunatsinnit aallartitat tassaapput, Inuussutissarsiornermut, Suliffeqarnermut Niuernermullu naalakkersuisoqarfimmi atorfillit, Pinngortitamut, Avatangiisinut taamatullu Inatsiseqarnermut naalakkersuisoqarfimmi atorfillit taamatullu Nunanut Allanut tunngasunut naalakkersuisoqarfimmi atorfillit.
Tassalu taakku maanna suliassaat tassaassaaq paasiniassallugu, Kalaallit Nunaat isumaqatigiissummut ilaassanersoq imaluunniit Nunatta naalagaaffeqatigiinnermut ilaanera pissutigalugu isumaqatigiissummut ilaassannginnersoq. Kaj Holst Andersen taamma aamma nalunaaruteqarpoq.
Aamma atuaruk COP21 Parisimi isumaqatigiissummut Kalaallit Nunaat pituttugaanngilaq
Taanna aamma oqarpoq Parisimi isumaqatigiissut Kalaallit Nunaannut pingaaruteqartuusoq aammali oqarluni peqataanissamut aalajangernissaq ajornakusoortuusoq. Kaj Holst Andersen taama oqareerluni aamma nassuiaavoq, silap pissusaa pillugu isumaqatigiissut piviusorsiortuulluinnartoq aamma naalagaaffiit isumaqatigiissuteqartut tamarmik CO2-mik aniatitsinertik qaquguugaluarnersoq appartissagaat.
Nunattali CO2-mik aniatitsinera appartinneqassappat tamanna Nunatsinnut ajornakusoortussaassasoq, Kaj Holst Andersen aamma oqarpoq, tassa aniatitsinerput appartinneqassappat tamanna akisunaarsinnaagipput oqarluni, tassami Nunatta ataatsimut aningaasaataasa 40 procenti naalagaaffimmit tapiissutinit matussuserneqartarmata.
Naalagaaffimmit tapiissutinit Nunarput ikiorneqaannassanngippat Nunatsinni suliffissuarnik pilersitsiortornissaq Naalakkersuisunit kissaatigineqarpoq. Taamaattoqassappallu CO2-mik aniatitsinerput annertuumik qaffariartussaassasoq, Kaj Holst Andersen oqarpoq.
Tassalu ilaatigut tamannarpiaq pissutaalluni, Parisimi isumaqatigiissummut Nunatta peqataanissaa ilimananngitsoq oqarluni. Aamma taanna oqarpoq, nunarsuatsinni nunat inoqqaavisa pisinnaatitaaffii, Parisimi isumaqatigiissummut ilanngunneqarsimasuuppata suna tamarmi allaanerusimassagaluartoq, tassa taamaattoqarsimasuuppat Nunarput pinngitsoorani isumaqatigiissummut inatsisitigut pituttugaasimassagaluarmat.
Nalagaaffit 196-iusut tamarmik atsiornissaat aappaagu aprilip 22-anniit aallartittumik atsorneqarsinnaalissaaq. Ullorlu tamanna nallertinnagu Naalakkersuisut isummereersimasussaapput. Tamassumunnga Inatsisartut aalajangeeqataassanersut suli isummerfigineqanngitsoq,