CO2-mik aniatitsinerput ukiut qulit ingerlanerini annikinnerulersimavoq
![](/sites/default/files/styles/image_934x467/public/article_images/nukissiorfiit_1.jpg?itok=xo80joxt)
Taama naliliivoq Nunatta Naatsorsueqqissaartarfiani siunnersorti, Lene Baunbæk.
- Naatsorsuinerit takutippaat, angerlarsimaffinni nukissiuutinik atuinerit ukiut qulit ingerlaneranni annikilliartorsimasoq. Tamassumunnga pissutaanerulluni angerlarsimaffippassuarni kallerup innera atorlugu kiassartoqartalersimanera, Lene Baunbæk oqarpoq.
Siorna 2014-imi CO2 aniatitarput katillugu 521.000 tonsiuvoq. Tassa Nunatsinni innuttaasut tamaasa ataatsimut isigalugit inuk ataaseq 9 tonsip missaannik CO2-mik aniatitsisimalluni. Tamanna 2004-mut sanilliukkaanni 19 procentimik annikinnerulluni.
Aamma atuaruk COP21 Qujaukitsoq: Ajornakusoortorujussuarmik isumaqatigiinniarnerit naammassipput
Nukissiorfik CO2 -mik aniatitsinikinnerulersimavoq
Nukissiorfiit sarfamik kiammillu angerlarsimaffinnut pilersuisut, ukiut qulit kingulliit ingerlaneranni CO2-mik aamma aniatitakkinnerulersimapput, tassa ukiut qulit kingulliit eqqarsaatigalugit 32 procentimik aniatitakinnerulersimasut, Lene Baunbæk oqarpoq.
- Ukiut qulit kingulliit eqqarsaatigalugit uulia atorlugu kiassarnerit annikillisimapput. Tassalu tamassuma pilersippaa, Nukissiorfinnit CO2 aniatinneqartoq 2004-mut naleqqiullugu, 32 procentimik annikinnerulersimalluni, Lene Baunbæk oqarpoq.
Aamma atuaruk Nukissiuutinik atuinerput 2014 appariarpoq
CO2-mik annikinnermik aniatitaqalernitsinnut pissutaasoq pingaarnerpaaq tassaavoq, Nunatsinni erngup nukinga atorlugu mukissiuutit pilersinneqarsimaneri, taamaalilluni Nunatta minguinnerulerneranut tamanna pisooqataalluinnarluni.
- Sarfimik kiammillu pilersuinermi erngup nukinga atorlugu pilersuineq pitsaalluinnartuuvoq, tassa uulia atorlugu kiassarnermut naleqqiullugu erngup nukinga annikinnermik atuisarami.
Aningaasarsiornerup appariarnera aamma pissutaaqataavoq
Nunatsinni CO2-mik atuinikinnerulersimanerput aamma allamik pissuteqartoq, Lene Baunbæk oqarpoq, tassa Nunatsinni aningaasarsiornerup appariartornerata tamanna pilersikkaa oqarluni.
- Suliffeqarfiit aningaasarsiornerisa appariarsimanerat tamassumunnga malunnaataalluinnarpoq. Tassa nukimmik annikinnermik atuinermi aningaasarsiornerup appariarnera pissutaaqataasartoq malunnarluni.
Nunatta Naatsorsueqqissaartarfiani siunnersorti, Lene Baunbæk taama oqarpoq.