COP21 Qujaukitsoq: Ajornakusoortorujussuarmik isumaqatigiinniarnerit naammassipput
- Kalaallit Nunaat isumaqatigiissummut atsiorneqartumut qanoq isummersussanersoq sukumiisumik nalilersornissaanut, Naalakkersuisut tamakkerlutik periarfissaqarnissaat maannakkut pingaaruteqarpoq. Kalaallit Nunaannilu siunissami suliffissuaqarnikkut ineriartortitsinissamik kissaateqarneq eqqarsaatigalugu, Nunap inoqqaavi isumaqatigiinniarnerni iluamik akuutinneqannginneri pakatsissutigalugit, siornatigut Qujaukitsup oqaatigaa.
AAMMA ATUARUK IA-p Demokraatillu isumaqatigiissut iluarisimaarpaat
- Isumaqatigiissuterpiami siunertanut paragraffimi tassunga innersuussinissaq, Kalaallit Nunaata tungaaniit kissaatigineqarsimagaluarpoq. Tamanna iluatsinngilaq. Tamatumunnga taarsiullugu isumaqatigiissummi inaarutaasumik akuerineqartumi isumaqatigiissummut aallaqqaasiussani nunap inoqqaavisa pisinnaatitaaffiinut innersuussisoqarpoq. Tamannalu taamaaqataanik silap pissusaa pillugu nunani tamalaani isumaqatigiissummi peqataasunut isumaqatigiissuterpiami inatsisitigut pisussaaffiliinngilaq, Qujaukitsoq tusagassiutinut nalunaarummi nassuiaavoq.
- Taamaattoq Kalaallit Nunaat aalajangersakkani taakkunani ilaatinneqarsinnaanngilaq, tassami Kalaallit Nunaat Kunngeqarfik Danmarkip ilaatut nammineerluni immikkut isumaqatigiissummi peqataanngimmat, aammalu Kalaallit Nunaat annikitsuaraannarmik suliffissuaqarfiugaluarluni, isumaqatigiissummi aalajangersakkat ataanni nunatut ineriartorfiunngitsutut taaneqarsinnaanani, tusagassiuutinut nalunaarummi ilaatigut taamma allapput.
AAMMA ATUARUK Vittus: Isumaqatigiissut pakatsinarpoq
Nunanut Allanut Naalakkersuisoq, Vittus Qujaukitsoq isumaqatiginninniarnerni Naalakkersuisut, Kalaallit Nunaata nunarsuarmi silap pissusaanut isumaqatigiissummi nutaami peqataanissaanut, killissaliussat pillugit Danmarkimut isumaqatiginninniarnissamut piginnaatitsisimasut, sinnerlugit peqataavoq.
Kalaallit Nunaat aamma nunarpassuit allat ukiup innersuunneqartup aallartinnerani taasarialimmik suliffissuaqarnermik ingerlataqanngitsut, taamaalillutik siunissami aningaasaqarnikkut ingerlataqarnermut annertoorujussuarmik akiliisussanngorsinnaanerat aarlerinaateqartoq ilaatigut oqaatigaa.
