CIA pillugu suliaq pingasoriaammik kanngunartuliaavoq
Nunanut allanut ministerip Villy Søvndalip suliamik aqutsinera ministeriusimasup Lene Espersenip, Arctic Five ataatsimiinnermut 2010-mi peqataannginneranut, kukkuluttorluni ajutoorneranut Politikenimi ullumi saqqummersumi Lars Trier Mogensenip assersuuppaa. Arctic Fivemut ataatsimeeqataannginneq Trier Mogensen naapertorlugu issittumut Kalaallit Nunaannullu soqutigisaqannginnermik ersersitsisuuvoq.
Politikenimi ullumi ima allappoq: "Søvndal isumaqaruni misissuinissat pereernikunik akisuunillu taaginnarlugit mamianartuliamik unitsitsisinnaalluni isumaminik uniuuttuussaaq. Pissaanillit atornerluinerannik, pissutsini assigiinngitsuni pingasuni, CIA pillugu mamianartuliaq takussutissaavoq":
Pissutsillu assigiinngitsut pingasut Trier Mogensen naapertorlugu ukuupput:
Danmarkimi naalakkersuisuisa Danmarkip Kalaallit Nunaatalu USAp unioqqutitsilluni peqqarniisaarnianut sorsunneranut ilanngutsitaasimanera nipaatsumik akuersaarsimagaat.
Tamassuma kingorna sallusaqattaarnerit kanngunarsiivipput. Nunanut allanut ministereqarfiup pinaaserluni CIA-p timmisartuussisarsimaneri inunnut paasitikkumannginneri 1957-imi ministeriunerusimasup H.C. Hansen-ip isertorluni USAp Thulebasemi atomip nukinganik qaartartuuteqarsinnaanera - kalaallit qallunaallu sianiginngisaannik - akuerineranut suliamut assingusoq Trier Mogensen isumaqarpoq.
Naggataagullu Trier Mogensen isumaqarpoq Søvndalip CIAmut suliamut ajorumaataarnerata kalaallit namminersulivikkusunnerannik sukkatsisaataasinnaasoq taamaalillunilu Danmarkimut ulorianaateqarsinnaasoq, tassami issittoq tassatuaamma kunngeqarfiup Danmarkip sunniuteqarfigisinnaasaa.
"Søvndal nunarsuarmik pitsaanermik takorluugaqarsinnaavoq, toqulli timisartuinit malersorneqartuassaaq ajorsaarutit saqqummiutinngikkunigit." Trier Mogensen naggasiivoq.
Naalakkersuisut siulittaasuata Kuupik Kleistip qaammatip naanerani Nunanut allanut ministeri Villy Søvndal Københavnimi ataatsimeeqatigissuaa, Kuupik Kleistiullu CIA pillugu suliamut arlaannaanulluunniit attuumassuteqanngitsumik misissuinissamik kalaallit piumasaqaataat saqqummiunniarpaa.
