Christiansborgimi kokain-i
Allattoq Mads Lynge
novembarip 13-at 2006 08:02
Ikiaroornartut tamani tamaani nassaassaapput, aammattaaq Christiansborgip perusuersartarfiini.
Aviisip BT-p perusuersartarfiit misissuiffigisimavai, perusuersartarfinnilu pingasuni kokaini nassaarineqarsimavoq.
Aviisi Jyllandsposten taama allappoq.
Partii De Radikale Venstre-p, Enhedslistenip aamma Dansk Folkepartiip allaffeqarfiisa eqqaanni perusuersartarfiit kokainimik nassaarfiusimapput.
Kokainimik nassaartoqarsimanera politiinit qularutigineqanngilaq.
- Misissuinermi kukkusoqarsimanngilaq, vicepolitikommissæri Jørgen Rasmusseni oqarpoq.
Peter Skaarup Dansk Folkepartiimeersoq pisimasoq pillugu tupassimaqaluni oqarpoq, Folketingillu siulittaasoqarfianit iliuuseqalersaartoqarnerarlugu.
