Christianiami ataatsimoorussilluni Pusher Street matuvikkusunneqarpoq

Christianiami Pusher Street matussaaq.

Taama Christianimi najugallit sapaammi unnukkut ataatsimiinnerminni aalajangertut tusagassiorfinnut nalunaarummi ilisimatitsissutigineqarpoq.

Christianiami ataatsimoorluni aatsaat siullerpaamik aqqusinermik matuserusulluni nalunaartoqartoq, Hulda Mader Ritzauimut oqarpoq.

Christianiami tusagassiortunut attaveqaataasuni oqaaseqartartuuvoq.

- Alloriarnerujussuuvoq aalajangiinerlu ajornaatsuinnaasimanani. Ataatsimiinnermili amerlanerussuteqarluartut matusinissamik isumaqataapput, Hulda Mader oqarpoq.

Ataatsimiinneq ingerlanneqarpoq arfininngornermi angutip 30-nik ukiullip Pusher Streetimi aallaasersortoqarnerani toqutaanerata kingorna. Aqqusineq Christianiami aaqqissuussamik hashimik tuniniaanermut qitiusutut ilisimaneqarpoq.

Ukiut 50-it sinnerlugit Christianiami hashimik tuniniaasoqartarsimavoq.

Pingaartumilli ukiuni kingullerni Pusher Streetimi pinerlunneq nakuusernerlu sakkortutsissimavoq. 30-nik ukiulimmik arfininngormat toqutsineq toqutsinernit arlaqartunit kingulliuinnarpoq.

Ilaatigut angutip 23-nik ukiullip inuunini 2022-mi annaavaa.

Ministeri ersarissuliortoq

Sumiiffimmi sakkortuumik pinerlunnerit unitsinniarnerannik suli iluatsitsisimannginnermut pingaarnertut Christianiamiut ilaasa pinerluttunik illersuisimanerannik pissuteqarpoq.

Taama inatsiseqarnermut ministeri Peter Hummelgaard (S) sapaammi allagaqarluni oqaaseqaateqarpoq.

Aamma isumaqarpoq Pusher Streetimi hasheerniarneq matuneqassasoq.

- Pusher Street pillugu tamakkiisumik pilersaarut ilaatigut Københavns Kommunemit, politiinit, uatsinnit Christianiamilu najugalinnit maanna ilusilersorneqaleruttortoq tapersersorluinnarpara. Soorlu aamma najugaqartut nipituuliornerat nuannaarutigigiga.

- Maannamut bandit pinerlunnerlu ilaatigut illersorneqarsimapput - tamanna unissaaq. Ataavartumimmi allannguineq iluatsissagutsigu ataatsimoornermi suliassat isumaginissaannut tamatta kivitsinissaput pisariaqarpoq, ministeri oqarpoq.

Oqaaseqartartup Hulda Maderip aaqqissuussamik pinerluuteqartarnermut illersuisoqarneraaneq ilisarisinnaanngilaa.

- Illersugaqanngilagut. Inuunerput atorparput. Niuffannermut attuumassuteqanngilagut.

- Qatsulluinnarparput. Matorusullugu maanna oqarpugut. Qanoq pinissaa oqartussat isumagisassarissavaat, Hulda Mader oqarpoq.

/ritzau/