Angut 18-inik ukiulik Christianiami toqutsisoqareernerani tigummigallagassanngortitaasoq
Angut 18-inik ukiulik, angummik 30-nik ukiulimmik Christianiami arfininngornermi unnukkut toqutsinermut pilersaarusioqataasimasutut pasineqarluni ulluni 25-ni sapaammi tigummigallagassanngortinneqarpoq.
Københavnip politiivi attaveqaqatigiittarfikkut X-ikkut, Twitteritut siornatigut ilisimaneqartukkut, taama ilisimatitsipput.
18-inik ukiullip illersuisuata tigummigallagassanngortitsineq Danmarkimi eqqartuussisuuneqarfimmut Landsretimut suliareqqitassanngortippaa.
18-inik ukiullip tigummigallagassanngortinneqarnera Landsretip taamaasilluni maanna aamma aalajangiiffigisussanngorpaa.
18-inik ukiulik pinngitsuunerarpoq. Illersuisua Janus Malcolm Pedersen nutaarsiassaqartitsivimmut Ritzauimut taama oqarpoq.
Landsretip tamanna ullumi ataasinngornermi aqaguluunniit marlunngornermi aalajangiiffigiumaaraa ilimagineqarpoq.
Angutit marluk kiinnaminnik assiaqutsersimasut Christianiami arfininngornermi unnukkut aallaasersornermi angut 30-nik ukiulik toquppaat, inuillu sisamat allat ikilerneqarlutik.
18-inik ukiulik aallaasersornermi toqqaannartumik peqataasimagunanngitsoq oqaatigineqarpoq, aallaasersortulli aallaasersornerup kingorna qimaanerannut ikiuisimasutut pasineqarluni.
Toqutaasup rockerinut pinerlunniaqatigiinnulluunniit allanut attuumassuteqarnera Københavnimi politiit uppernarsarpaat.
