Champions League: 17-nik ukiulik Asii Kleist Berthelsen oqaluttuarisaanermut ilannguppoq
Kalaallit maanna tulluusimaarutigisinnaanngorparput silami arsaannermi qaffasinnerpaamik unamminermi peqataatitaqartalernerput.
Fortuna Hjørring pingasunngornermi ualikkut nammineq arsaaffimmini Champions Leaguemi FC Barcelonamut unammivoq.
Qallunaat iligiit FC Barcelonap arsaaffiani unammeqqaaramik 4-0-mik ajorsarput. Taamaattumik angummanniapiloortussanngoreerput Asii Kleist Berthelsenip iligisai Fortuna Hjørringimeersut kvartfinalemut anngunniassappata.
Spaniamiulli iligiit tusaamasat Fortuna Hjørringimut arsaalluaqaat unamminerlu naammassimmat 5-0-mik ajugaallutik.
Nuannersuali tassaavoq kalaaleq arsaatillammak17-niinnarnik ukiulik Asii Kleist Berthelsen Nuummeersoq minutsialunni arsaateqataammat.
Unammineq aallartimmat Asii Kleist Berthelsen Fortuna Hjørringimi paarlatsissamaataavoq, taamaattorli mumereernermi minutsini 15-ni arsaateqataavoq.
- Soorunami unamminernit allaniit Champions Leaguemi arsaateqataalluni allaaneruvoq. Champions Leaguemi unammisut isiginnaartarnikuuakka unamminernilu angisuuni peqataasartut qummut isigalugit. Taamaattumik unammeqataalluni misigisaq angisoorujussuuvoq, Asii Kleist Berthelsen oqarpoq.
AAMMA ATUARUK Ligami sungiusaasoq: Asii Danmarkimi ligami kakkannerit ilagilersinnaavaat
FC Barcelona Fortuna Hjørringimiit kakkanneruvoq taakkulumi marloriarlutik unamminerni katillugit 9-0-mik ajugaapput.
Unammisat pikkorissut
FC Barcelonamut unammineq ottendedelsfinaleuvoq. Taamaasilluni ukiumi unammiffiusumi ingerlasumi Fortuna Hjørringip tassani peqataanera tamaanga killqeqarpoq. Isersimanerli Asii Kleist Berthelsenimut ilikkagaqarfiulluarpoq.
- Malunnarpoq unammisavut pikkorinnerusut sivisunerusumillu arsaqatigiittarsimasut. Aamma arnani inersimasuni uanga unammeqataarpiarnikuunngilanga. Taakkuli nukittupput imminnut sungiusimalluarlutik, Asii Kleist Berthelsen oqarpoq.
Ajugaanngikkaluarlutik taamaattoq minutsit isersimaffigisani pingaaruteqartorujussuusut Asii isumaqarpoq.
- Uannut assut pingaarpoq uatsinniit pikkorinnernut unamminermi arsaateqataanera. Misigisaq pikkunarpoq aammali timikkut tamaviaarnartorujussuulluni, Asii Kleist Berthelsen.
AAMMA ATUARUK Maligassiuisut: Inuusuttut timersullammattut toqqagaapput
Fortuna Hjørringip U-18-ni unammisartuini aamma unammisartuuvoq taakkulu unammisattaarneri ukiuunerani uninngareerlutik martsip 27-at aallarteqqissapput.