Maligassiuisut: Inuusuttut timersullammattut toqqagaapput
Taekwondortatoq Maasi Davidsen Nuummeersoq timersortartuni pikkorinnerni takutitsilluarnerpaatut timersullammannik toqqaanermi Maligassiuisuni kulturip illorsuani Katuami arfininngornermi unnukkut nersornaaseqarneqarpoq.
Maasi Davidsen timersuummini ukiut kingulliit siuariartorluarpoq oqimaassutsiminilu 2019-mi VM-rtoqarnerani bronzennalluni. Pikkorinnernik nersornaasiisumit Elite Sport Greenlandimit checkimik 25.000 koruuninik aningaasartalimmik tunineqarpoq.
Taekwondortartut aamma allamik Elite Sport Greenlandimit unnuk taanna nersornaatisipput. Louis Nielsen piukkunnaatilinnik ineriartortitsilluartutut nersornaaserneqarpoq. Nammineq koreamiut illersoriaasiannik aallussinermi saniatigut ukiuni 23-ni sungiusaasuuvoq taekwondomilu nunanut allanut unammisartuni sungiusaasooqataalluni.
Piukkunnaatilik nersornaatisivoq
Kalaallit Nunaanni timersoqatigiit kattuffiat aamma Maligassiuisuni nersornaasiivoq taannalu Faxe Kondi Legatimik taaneqartarpoq.
Timersullammattut toqqarneqartoq tassaavoq isikkamik arsaannermi piukkunnaateqarluartoq Asii Kleist Berthelsen Nuummeersoq. Taanna maanna Hjørringimi ukiup aappassaa najugaqarpoq timersuunni aallullugu aammalu qallunaat inuusuttuni nunanut allanut unammisartuiniilluni. Asiip angajoqqaavisa Tønnes O.K. Berthelsenip aamma Ivalu Kleistip panitsik sinnerlugu nersornaat tiguaat.
Najuuttut aamma nikuillutik ersaartaapput immikkut nersornaat tunniunneqarpoq. Tassannga tunineqartoq tassaavoq Jakob Amondsen Nuummeersoq. Taanna Nuup qaqqaanut Ukkusissamut majuakulaartuuvoq. 2020-milu 1000-ssaa qaqimmat soorunami maluginiarneqarpoq.
Namminersorlutik oqartussat pitsaaliuinermut immikkoortoqarfiat aamma nersornaatinik agguaavoq tassani atuarfik, suliffeqarfik timimik aalatitsiffiulluartoq aammalu piumassutsimik suliniarluartoq nersornaaserneqarlutik.
Aajuku Maligassiuisut 2020-mi nersornaaserneqartut:
Kalaallit Nunaanni Timersoqatigiit Kattuffiata nersornaasiissutai:
Faxe Kondi legat: Ukiumi timersullammak: Asii Kleist Berthelsen (Hjørring – isikkamik arsaattartoq)
Faxe Kondi legat: Ukiumi aqutsisuullammak: Abel Jakobsen (Qaqortoq – Qajaq)
Faxe Kondi legat: Ukiumi sungiusaallammak: Dorthe & Jan Hagberg (Qaqortoq – Badminton)
Ukioq manna immikkut ittumik nersornaasiissut: Jakob Amondsen (Nuuk)
Paarisamit nersornaasiissutit:
Ukioq manna atuarfik eqeersimaartoq: Qinnguata Atuarfia (Kangerlussuaq)
Ukioq manna suliffeqarfik eqeersimaartoq: Qasigiannguit Katersugaasiviat (Qasigiannguit)
Ukioq manna inuiaqatigiinni eqeersimaartoq: Abia Ottosen (Ilulissat)
Elite Sport Greenlandip nersornaasiissutai:
Sparinvest-imit aningaasaliiffigineqartoq
Piukkunnaatilinnik ineriartortitsilluarnerpaaq: Louis Nielsen (Nuuk - Teakwon-Do)
Timersornermi takutitsilluarnerpaaq: Maasi Davidsen (Nuuk - Teakwon-Do)
