Cataloniap namminiilivittunngornini ullualunnguit qaangiuppata suaarutiginiaraa
Spaniami nunap immikkoortuata taassuma naalakkersuinikkut aqutsisua Carles Puigdemont, Cataloniami innuttaasut Spaniamit avissaartoqarnissaanut sapaatiummat taasitinneqareernerisa kingorna tusagassiortunit siullerpaamik apersorneqarnermini taama oqarpoq.
Cataloniamili innuttaasut taasitinneqarmata qinersisinnaatitaasut akornanni 42,3 procentiinnaat taasiartorput.
Spaniami naalakkersuisut Cataloniami naalakkersuisunut qalliunialersinnaanerat pillugu Puigdemont aperineqarami ima akivoq:
- Kukkunerussaaq annertooq sunik tamanik allannguisitsisussaq, Carles Puigdemont oqarpoq.
Spaniap kunngia tv-kkut aallakaatinneqartukkut oqalugiarami Cataloniami naalakkersuisunik isornartorsiuingaatsiarpoq.
AAMMA ATUARUK Cataloniami taasisitsinermi 460-it ikiligaapput
Cataloniami innuttaasut sapaatiummat taasitinneqarnerat Spaniami inooqatigiinnermik qajannarsisitsisimasoq kunngi Felipep ilaatigut oqaatigaa.
Spaniamilu nunap tunngaviusumik inatsisaa aallaavigalugu pissutsinik aaqqiisoqartariaqartoq tv-kkut toqqaannartumik aamma oqaatigaa.
Cataloniamiut inatsisaatsuuniarnerat suna tamaat tikillugu akiorniaritsik, Spaniap naalakkersuisuisa oqaatigereerpaat.
Cataloniamimi innuttaasut sapaatiummat taasitinneqarnerat inatsisaatsuliornerusoq, Spaniap naalakkersuisuisa nunallu tunngaviusumik inatsisaa aallaavigalugu eqqartuussiviata nalunaarutigereerpaat.
/ritzau/
