Coronavirusimik Danmarkimi tunillatsissimasut maajimili aatsaat taama amerlatigisut
Coronavirusimik Danmarkimi tunillanneqarsimasut akornanni napparsimmavimmi uninngasut 18-inik amerlipput. Naalagaaffiup Nappaatinut Akiussutissaliorfiata Statens Serum Institutip nalunaarsuinerata tamanna takutippaa.
Coronavirusimik tunillanneqarsimasut napparsimmavimmi uninngasut maanna katillutik 110-nngorput. Maajip ulluisa 28-annili aatsaat taama amerlatigalutik.
Inuit coronavirusimik tunillanneqarsimasutut nalunaaquttap akunneri 24-t kingulliit ingerlaneranni paasineqartut 435-usut ataasinngornermi nalunaarutigineqarpoq, taakkunanngali nappaammik toqquteqartoqarsimananani.
AAMMA ATUARUK Danmarkimi tunillatsissimasut aatsaat taama amerlatigisut: Coronavirusimik tunillatsittut nutaat 678-it uppernarsarneqartut
Tunillatsissimasut tallimanngormalli ikiliartortut, nappaalanernut tunngasunut immikkut ilisimasallip Viggo Andreasenip maluginiarpaa. Nalunaaquttammi akunneri 24-t ingerlaneranni tunillanneqarsimasut amerlanerpaammata 678-it tunillanneqarsimasutut tallimanngormat paasineqarput.
- Nappaat tuniluuppallaarunnaariartortutut isikkoqarpoq. Tamanna nuannaarutigaara.
- Nappaalanerup pakkersimaarneqarsinnaanngoriartorneratut isigaara, Viggo Andreasen oqarpoq.
AAMMA ATUARUK Namminersorlutik Oqartussat: Angalanissat pisariaqanngitsut tamarmik pinaveersaarneqassapput
Nappaammik tunillanneqarsimasut napparsimmavimmullu unittut pillugit kisitsisit, ministeriunerup Mette Frederiksenip ernumanartutut nutaarsiassaqartitsivimmut Ritzauimut taavai.
- Innuttaasut innersuussutinik malinninnissaat kaammattuutigiinnarsinnaavara, tamatta nappaatip tuniluunnerata pakkersimaarneqarnissaanut qanoq iliuuuseqarsinnaanerput eqqumaffigalugu, Mette Frederiksen oqarpoq.
Coronavirusi Danmarkimi upernaaq tuniluutilermalli tunillanneqarsimasutut maannamut paasineqartut 27.000-nit amerlanerupput.