COVID-19-ip Danmarkimi tuniluunnerata annertusiartornera ingerlaannarpoq – taamaattumik suliffeqarfiit, oqartussaasut innuttaasullu nuna qimallugu pisariaqanngitsumik angalanissanik pinngitsuuinissaannik maanna Namminersorlutik Oqartussat inassuteqaateqarput.Assi: KNR

Namminersorlutik Oqartussat: Angalanissat pisariaqanngitsut tamarmik pinaveersaarneqassapput

Suliffeqarfiit, oqartussaasut innuttaasullu nuna qimallugu pisariaqanngitsumik angalanissanik pinngitsuuinissaannik Namminersorlutik Oqartussat maanna inassuteqaatigaat.

Kufferti uninngatiinnaruk Kalaallit Nunaanniiginnarlutillu - Danmarkimulli angalaniaruit tamanna aatsaat pisariaqavissappat pissaaq.

Nunatsinnit angalanissat pisariaqanngitsut tamarmik pinaveersaartinneqarnissaat Namminersorlutik Oqartussat innersuussutigaat.

Sulinngiffeqarnermut atatillugu angalanerit, sulinermullu atatillugu angalanerit pisariaqarluinnanngitsut, sulinermullu atatillugu angalanerit, siunertaasumik oqarasuaatikkut imaluunniit videokkut ataatsimeeqateqarnikkut naammassineqarsinnaasut matumani pineqarput.

Danmarkimi kommunit ilaanni inuit 100.000-iungaata nutaanik 30-nit amerlanerusut coronavirusimik tunillanneqarsimasut paasineqareersullu Namminersorlutik Oqartussat taama innersuussuteqarput.

Nappaatip Danmarkimi tuniluutileqqinnera pissutaalluni Nunatsinnut annguteqqissinnaanissaanut ernumalersitsisoq, Namminersorlutik Oqartussat nittartakkaminni ilaatigut allaaseraat.

- COVID-19 nunatsinnut angalasut aqqutigalugit Kalaallit Nunaannut tikittussaavoq, aammalu piffissap angalanerpaaffiusup qaangiunnerani innuttaasut Kalaallit Nunaanni najugallit, sulinerminnut atatillugu sulinngiffeqarlutilluunniit angalasimasut tikittarput.

Inuit 559-it Danmarkimi coronavirusimik ullup unnuallu ingerlanerani tunillanneqarsimasut ippassaq sisamanngornermi nalunaarutigineqarpoq. Inuit 500-nit amerlanerusut tunillanneqarsimasut ullut pingajussaa nalunaarsorneqarsimapput.

- Taamaattumik suliffeqarfiit, oqartussaasut innuttaasullu nuna qimallugu pisariaqanngitsumik angalanissanik pinngitsuuinissaannik maanna Namminersorlutik Oqartussat inassuteqaateqarput.

Angalanissamilli aalajangiinissaq innuttaasut, suliffeqarfiit oqartussaasullu ataasiakkaat aalajangigassagiraat, Namminersorlutik Oqartussat erseqqissaatigaat.

Killilersuisoqaqqilernissaa eqqarsaatersuutigineqartoq

Danmarkimit nunatsinnut tikittut inuit 100.000-iugaangata inunnik 30-nik nutaanik tunillatsissimasoqarfiusumit tikittussanut tallimanngormat inassuteqaateqartoqarpoq, tikinnermiit ullut tallimat qaangiunnerini misissortinneqarnissaat innersuussutigineqarluni.

COVID-19-imik tunillatsissimannginnissap uppernarsarneqarsinnaalernissaata tungaanut inunnut qanillisaqarnaveersaassasut, aammalu inuit akornanni aaqqissuussinernut ornigutissanngilluinnassasut aamma innersuussutaavoq.

Tikinnermi ulluni tallimani angerlarsimaannartarnerup misissorteqqittarnerullu atuutsinneqaqqilernissaat Namminersorlutik Oqartussanit aamma eqqarsaatigineqarpoq.

AAMMA ATUARUK Corona: Angerlarsimaannarnissamut piumasaqaateqaleqqissinnaasoq

Sulili aalajangerneqanngitsoq, Naalakkersuisut siulittaasuata naalakkersuisoqarfiani pisortap, Strategisk Corona Stab-imi aamma siulittaasuusup, Hans-Peder Barlach Christensenip ilisimatitsissutigaa.

Coronavirusimik tunillanneqarsimasunik nutaanik Kalaallit Nunaanni nassaartoqarnikuunngilaq. Nanortalimmi ukioq manna juulimi siumuisoqarpoq.

Katillugit 14-it nappaammik tunillanneqarsimasut, arlaannaalluunniillu napparsimmavimmut unitsinneqarsimanani, tamarmillu peqqissereerlutik.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 10353
  Tunillanneqarsimasut
17
  Peqqisseqqittutut nalunaarutigineqartut 16
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  oktobarip 23-at 2020 nal. 10:45