Nunanit allanit

Canada Cannabisseerniarfiit nunguutsisut

Nunavummi ikiaroornartumik cannabisimik tuniniaaneq ima ingerlalluartigaaq, pisiniarfiit ammarmatali akunnialunnguit qaangiutiinnartut nunguutsillutik. KNR-ip Canadamit ilanngutassiisartut Marianne Stenbæk taama nalunaaruteqarpoq.

Allattoq Marianne Stenbæk, Montreal, Canada

oktobarip 19-at 2018 09:30

Nutserisoq Mads Lynge

Cannabis Canadami pingasunngormat inerteqqutaajunnaarsinneqarpoq, Nunavummilu tassa akunnialunnguit qaangiutiinnartut nungullutik.

Nunavummi cannabis internetikkoorlugu tamaallaat pisiarineqarsinnaavoq, amerlasuullu nittartakkamut tassunga ataatsikkut iserniarsarimmata sivisuumik utaqqisoqartariaqarsimavoq.

AAMMA ATUARUK Cannabis Canadami aqagu pingasunngornermi inerteqqutaajunnaassaaq

Cannabisit assigiinngitsut 70 sinnilaarlugit Nunavummiunut nittartakkatigut neqeroorutigineqarput, pingasuinnaalli ippassaq pisiarineqarsinnaasimallutik.

Canadamili cannabisimik inerteqquteqarunnaarneq nunap sinnerani aamma malugineqarpoq, Canadamimi nunap immikkoortuini allani ilimagisamiit tunisaqartoqarneruvoq, pisiniarfippassuillu nunguutsillutik ullup ingerlanerani matujaartariaqarsimapput.

Cannabisimillu nutaanik pilersuisoqalernissaa maanna utaqqineqarpoq, cannabisilli ussanneqarnera piffissami tulliuttumi annikilliartornissaa aamma ilimagineqarpoq.

AAMMA ATUARUK Oqaaseq cannabis Nunavummi taarserneqartoq

Canada Cannabisseerniarfiit nunguutsisut

Aamma atuaruk