Canadami inuuusuttut Grethe Thunberg peqatigalugu akerliussutsimik takutitsipput

Canadami inuit milliuunit affaannit  2 million nut amerlatigisut silap pissusaata allanngoriartornerata iliuuseqarfigineqarnissaa pillugu akerliussutsimik takutitsipput.  Akerliussutsimik takutitsineq  isumassarsiarineqarpoq, niviarsiaqqamit sverigemeersumit Greta Thunbergimit taassumami piumasaaraa, maannakkut  qanoq iliuuseqartoqartariaqartoq kingusinaartoqartinnagu.

Illoqarfissuarmi Montrealimi inuit halv millioninik amerlatigisut akerliussutsimik takutitsinermi peqataasimanissaat politiit eqqoriarpaat,  taakkua ingerlaaqatigiinnermi  siuttoqarput, indiaanerit, naggueqatigiit metisit inuillu inuusuttaannit aamma Greta Thunberg peqataavoq.  

Canadami ministeriuneq Trudeau meeqqani marluk ilagalugit ingerlaaqatigiittunut ilaapput. Akerliussutsimik takutitsilluni ingerlaaqatigiinneq sioqqullugu Justin Trudeap Greta Thunberg pisortatigoortuunngitsumik ataatsimeeqatigaa.
Canadap avannarpasinnerusortaani akerliussutsimik aamma takutitsisoqarpoq.

  Nutaarsiassaqartitsiviup CBC News  allaaserisaa naapertorlugu  Canadami naalakkersuisut allaffeqarfiata Iqaluniittup  saavani inuit hundredit missaanniittut akerliussutsimik takutitsisimapput.

Illoqarfissuarmi Ottawami inuusuttut ilinniagaqartut Nunavut Sivuniksavut Collegemi  ilinniartut Ottawami innuttaasut tusintillinnik amerlatigisut peqatigalugit akerliussutsimik takutitsipput.

Inuvimmi Canadap avannaani issittup imartaanut qanittumiittumi aamma akerliussutsimik takutitsisoqarpoq.
Akerliussutsimik takutitsissut ilaat Jordan Peterson oqarpoq, silap pissusaata allanngoriartornera Nunavimmi malugineqarsinnaalluartoq.

Akerliussutsimik takutitsisut amerlanerit inuusuttuupput taakkua Greta Thunbergip oqariartuutaanik isumassarsianik erinarsorput nilliallutillu:

- Siunissarput inuunerpullu pineqarput,  politikerit nunamilu aqutsisut silap pissusaa pillugu piffissaatillugu qanoq iliuuseqarfigisariaqarpaat, inuusuttut taama  nilliallutik akerliussutsimik takutitsipput.

AAMMA ATUARUK Greta Thunberg tissiartaammut ilaalluni New Yorkiliarniarpoq