Canadami uranisiorfik matuneqalersoq

Uranisiorfik provinsip Saskatchewanip avannaani Rabbit Lakemiittoq matugallarneqassasoq, aatsitassarsiorfiup Cameco korporationip sapaatit akunnerata siuliani nalunaarutigaa.

Rabbit Lakemi piiaaffik, illoqarfiup Saskatoonip avannaata tungaani 800 kilometerinik ungasissusisilik, nunarsuarmi uranisiorfinni anginerpaata tullerigaluarpaa.

Camecomi qullersat ilaat, Tim Gitzel, piiaaffimmukarpoq matunera nalunaarutigiartorlugu.

Uranip akia nunani tamani annikillisimasoq, Gitzelip Glope and Mailimut oqaatigaa. Tamatuma saniatigut Rabbit Lakemi piiaaffik pisoqaavoq, uranilu piiarneqartoq Camecop piiaaffiinut allanut naleqqiullugu annikinnerulluni.

Aamma atomimik nukiliorfiup Fukushimamiittup 2011-mi ajutoorfioreernerata kingorna urani tuniniarneqartoq pisiariniarneqartumut naleqqiullugu annerusoq, Gitzel nassuiaavoq. Atomimik nukiliorfiit arlallit isumannaallisaaneq pillugu matuneqareerput.

Piiaaffiup matunera pissutigalugu inui 500-jut suliffeerupput, USA-milu sulisut 85-it sunnerneqassapput. Camecoli 150-inik Rabbit Lakemiititaqaannassapput, taakku atortorissaarutinik nakkutilliissapput, piiaaffimmi siunissami ammaqqinneqarsinnaammat.

Camecop Cigar Lakemi Saskatcewanimilu piiaaffini ammatiinnassavai.