Canadamiu meeqqanik kinguaassiutitigut atornerluisimasutut ukiuni 19-ini parnaarussaassaaq
Maanna 67-inik ukioqartup palasiunerata nalaani 1978-miit 1982-imut atornerluinerpassuit ingerlanneqartarsimapput, .
Imminnissarsiornerpit Igloolimmi ilagiit katuullit romamiutut ilequllit inuusuttut sequmippai. Inuunerpassuit qaqugorsuarmut sequmippatit. Inatsisinik unioqqutitsinivit inuunerit naatippai, eqqornerlutatillu amerlasuut annanniaannaq inuulersillugit.
- Kukkussuterpassuatit maanna pillarneqaatigissavatit. Pineqaatissiineq una pillarneqaatissavit aallarniutigiinnarpaa, eqqartuussisoq Robert Kilpatrick eqqartuussutsip nalunaarutiginerani oqarpoq.
Aamma atuaruk Igloolimmi meeqqanik atornerluinerit
Meeqqat kinguaassiutitigut atornerlussimasai tassaapput nukappiaqqat aqqaneq marluk niviarsiaqqallu qulit, arfineq pingasut aqqaneq marlullu akornanni ukiullit. Meerarpassuit ilaatigut nerisassanik ussassaaruserluni aggersartarsimavai.
Naalagaaffik ukiunik 25-nik pineqaatisseeqqusisoq, illersuisuia ukiunut aqqaneq marlunnut naatsorsuutiginnikkaluartoq, ukiuni 19-ini parnaarussassanngortinneqarpoq. Maannamut ukiuni arfineq pingasuni parnaarussaareerpoq, 2011-imili tigusarineqarami tigummigallagaasimagami. Unnerluussisoq illersuisorlu isumaqatigiipput ullut tamakku marloriaammik naleqartinneqassasut.
Eric Dejaeger 1990-imi assingusunut eqqartuunneqarpoq. Taamanikkut ukiuni tallimani parnaarussassanngortinneqarpoq, qaammatilli 18-it qaangiutiinnartut iperagaaqqilluni.
