Igloolimmi meeqqanik atornerluinerit
Eqqartuussinermi Belgiamiu palasi unnerluutigisaavoq, matumanilu meeqqanik kinguaassiuutitigut peqqarniitsumik atornerluisoqartarsimanera pineqarpoq.
Palasip meeqqanik atornerluineri ukiut 30-t matuma siornagut pisimapput, tassa 1980-ikkut aallartilaarneranni, taanna taamani Illulimmi palasiutilluni, nunaqarfiup meerartai kaattut ussiataarlugit nerisassaannik neriorsorlugit illuminut pulaartittarsimavai.
Qaarsillarlutik nerereeraangata, sinittarfimminukaateriarlugit pinngitsaalillugit atoqatigisarsimavai.
Meeqqat taama pineqarnertik angajoqqaaminnut oqaluttuarigaangassuk upperiumaneqarneq ajorput, angajoqqaarpassuillu meeqqatik palasimit qanoq pineqarsimanerminnik oqaluttuaraangata pillartarpaat.
Taamaalilluni pinngitsaaliilluni atoqateqartarnerit atornerluinerillu allat, Illulimmi meeqqat akornanni isertugaatigineqalerput.
Atornerlunneqartarsimanermik oqaluttuat, Canadami Ilumoortussaq pillugu isumalioqatigiissitap sulineranut atatillugu saqqummiunneqaqqimmata, aatsaat upperiumaneqalerput.
Palasi, Eric Dejaeger, nunagisaminut Belgiamut qangali angerlartinneqareersimammat, Canadami oqartussat ukiuni arlalinni ilungersuuteqareerlutik taanna Canadamukartissinnaasimavaat, taamaalilluni meeqqanik atornerluisimanerminut unnerluutiginnissutit 69-iusut pillugit eqqartuussivimmut sassartinneqarsinnaaniassammat.
Eqqartuussineq Iqalunni malinnaaffigineqaqaaq, ilisimannittutullu nassuiaatinneqartunut, naggueqatigiinnit Inunneersunut, maanna inersimasunngorsimasunut, eqqaamasat amiilaarnartut qaffakaatinneqartarlutik.
