Canadami naggueqatitta inuuneq nalliuttorsiutigaat

Septembarip ulluisa qulingat tassaavoq imminut toquttarnerup akiorniarneranut nunarsuaq tamakkerlugu ulloritinneqartoq, Canadamilu naggueqatigiit Inuit ulloq taanna malunnartinniarlugu inuunerlu nalliuttorsiutiginiarlugu naapisimaartarput.

Naggueqatigiit Inuit akornanni imminnut toquttartut amerlasuupilussuupput:

Canadami naggueqatigiit Inuit akornanni imminnut toquttartut Canadamiunut allanut naleqqiullugit aqqanileriaammik amerlanerupput. Amerlanerpaartaallu, 83 procentit, 30-t inorlugit ukioqartuusarput tassaanerullutillu angutit inuusuttut.

Taamaammat Inuit Inuusuttaasa Siunnersuisooqatigiivini siulittaasup Maatalii Okaliup Inuit Tapiriit Kanatami siulittaasoq Terry Audla peqatigalugu ullup malunnartinniarneqarnerani aaqqissuisuunerat tulluarpoq.

Aammattaaq Ottawami naggueqatigiit Inuit meeqqanik sullissiviini atuartut aammalu piareersarfimmit Nunavut Svuniksavummeersut peqataassapput.

Erinarsortartoq Saali erinarsussaaq. Erinarsugassaalu tassaavoq “Sapiqangitunga” (tunniutiinnarunnanngilanga, aaqq.) inuusuttunit imminut toquttarnerup akiorniarneqarnerani suaartaatitullusooq atorneqartoq.