Canadami naalakkersuisuni ilaasortani qaffasissumi inissisimasumik tunuartoqaqqittoq

Canadami ministeriunerup Justin Trudeaup, naalakkersuisuutitaqarnerani aaqqiagiinngittoqarnerani naalakkersuisuni ilaasortani qaffasissumi inissisimasumik tunuartoqaqqippoq.

Canadami missingersuutinut allaffeqarfimmi siulittaasup, Jane Philpottip naalakkersuisut illersorsinnaajunnaarlugit oqaatigaa.

- Naalakkersuisunut ajoraluartumik tatiginnikkunnaarpunga, Jane Philpott oqarpoq.

Jane Philpott Canadami nunap inoqqaavinut peqqinnissamullu ministeriusimavoq, nunallu inoqqaavinut tunngatillugu saammaateqatigiittoqarnissaanut suliniummut suleqataalluinnarsimalluni.

Taassuma Justin Trudeaup Canadamiut suliffeqarfiutaat pillugu suliamut annertuumut akuliussimanerarneqarnera innersuussutigai.

Inatsisinik atuutsitsinermut ministeriusimasoq, Jody Wilson-Raybould, inatsisartut eqqartuussiveqarnermut ataatsimiititaliaannut februaarip 28-ani nassuiaatinneqartoq taama pisuutitsisuuvoq. 

Jody Wilson-Raybould naalakkersuisunit Trudeaup siuttuuffigisaanit siorna "toqqaannanngikkaluartumik sioorasaarneqarsimanerarpoq".

Ingeniøritut suliffeqarfimmi SNC-Lavalinimi Montrealimiittumi peqquserluttoqarsimaneranik pisuutitsisoqarneranik misissuinerminut atatillugu toqqaannanngikkaluartumik sioorasaarneqarsimanerarpoq.

SNC-Lavalin Canadami 9000-inik sulisoqarpoq, Quebecimiinnaq 3400-iullutik, nunarsuullu sinnerani 50.000-init amerlanerullutik.

SNC-Lavalin peqquserluttuliorsimasutut pineqaatissinneqassagaluaruni Canadap naalagaaffianik ukiuni qulini sullisseqqusaajunnaaratarsinnaavoq. 

Wilson-Raybould naapertorlugu inunnit aqqanilinnit naalakkersuisuneersunit suliap misissuiffiginnginnissaanik kimigiiserfigineqarsimavoq. 

Premierminister Justin Trudeau suliamut atatillugu "ikioqqusimavoq", ataatsimiinnermilu erseqqissaatigisimavaa SNC-Lavalinimik suliassanngortitsineq ajorluinnartunik kinguneqassasoq. 

Jody Wilson-Raybould inatsisinik atuutitsinermut ministeritut januaarimi soraarsinneqariataarpoq, taarsiullugulu sakkutuujusimasunut ministerinngortinneqarluni. Qaammallu ataaseq tassani ministeriuneerluni tunuarniarluni aalajangerpoq. 

Jane Philpottip naalakkersuisunut ministeriunermullu tunngatillugu paasissutissat ernumanangaatsiarnerarpai.

- Naleqartitakka, ileqqorissaarnissamut akisussaaffiga, nunallu naalakkersuinikkut ilusilersugaaneranut pisussaaffikka nammineq akisussaaffigaakka, Jane Philpott oqarpoq.

Justin Trudeaup taama pisuutinneqarnera pissutigalugu illuatungiliuttut siuttuata, Andrew Scheerip, tunuarniuteqarnissaa piumasaraa. Scheerip premierministeri "kanngunarnerarpaa" politiillu akuliutsinneqarnissaat kajumissaarutigalugu. 

Aamma naak Justin Trudeaup pasilliutigineqartut itigartikkaluarpagit. Justin Trudeaup qinersisartut ministeriunertut ingerlatiinnarusunnerlugu qinersisoqarnerani aalajangissagaat sapaatip akunnerata siuliani oqaatigaa.

Jane Philpottip soraarniarnera Trudeaup “pakatsissutigalugu” namminerli aalajangigassarigaa ataasinngornermi unnukkut oqaatigaa.